Azərbaycan, Bakı, 11 sentyabr /Trend, müxbir H.Vəliyev/
Rabitə və İnformasiya Texnologiyaları Nazirliyi Regional Rabitə Birliyinin (RRB) iştirakçı ölkələrində rəqəmsal yayıma keçidin iqtisadi aspektləri ilə bağlı müzakirələrdə iştirak edəcək. Bu barədə Trend-ə nazirlikdən bildiriblər.
Məsələyə RRB-nin sentyabrın 14-15-də Ukraynada keçiriləcək rabitə iqtisadiyyatı komissiyasının 26-cı iclası zamanı baxılacaq.
İçlas çərçivəsində məruzəçilər yaxın gələcəkdə analoq siqnalın yayımının söndürüləcəyi ilə əlaqədar yayımlayıcıların rahatlığı üçün hazırlanan, DVB-T2 standartına əsaslanan rəqəmsal televiziya haqqında ətraflı məlumat verəcəklər.
DVB-T2 yerüstü rəqəmsal teleradioyayım sisteminin ikinci nəsli fiksajlanmış mobil qəbul üçün də tətbiq edilə bilər, onun gücü isə analoji şəraitdə əvvəlki versiyasından (DVB-T) 30-50 faiz çoxdur. Bu versiyanı hazırlayanlar bu standartın istehlak dekoderləri ilə yüksək uyğunluğunu vəd edirlər.
İclas iştirakçıları radiotezlik spektrindən istifadə üzrə ödənişin təcrübəsi və praktikası ilə bağlı təcrübə mübadiləsi də aparacaqlar. Hazırda dünyanın üç regionunda müxtəlif teleradiotezliklər fəaliyyət göstərir, radiorabitə və yayımın müxtəlif texnologiyaları tətbiq edilir. Azərbaycan Avropa regionuna aiddir və bu, Azərbaycana Avropa radiotexnologiyalarını seçməyi diktə edir. Belə ki, başqa seçim sərhədyanı rayonlarda radiotezlik spektrinin qeyri-effektiv istifadəsinə səbəb ola bilər.
Azərbaycanda rəqəmsal televiziya Bakı və Abşeron yarımadası ərazisində təcrübi istismara verilib. Rəqəmsal televiziya yayımı MPEG-4 standartında həyata keçirilir. Televiziyanın rəqəmsal standartına keçmək üçün əhali dekoderlər almalıdır. Bu qurğuların dəyəri 40-50 manatdır. Bundan başqa, artıq bazarda dekoderləri quraşdırılmış televizorları almaq mümkündür.
Rəqəmsal teleyayım üçün 174 - 230 MHz diapazonları tətbiq edilib və 6-12 kanalı əhatə edir.
Yayım bir kanalla 10 proqramı yayımlamağa imkan verən MPEG-4 standartında həyata keçirilir. İlin sonunadək isə Bakı və Abşeron yarımadasında rəqəmsal formatlı telekanalların sayı 20 ədədə çatdırılacaq. Göstərilən dövrdə Lerik, Şirvan və Gəncə ərazisi də rəqəmsal televiziya ilə əhatə olunacaq və regional səviyyədə 10 telekanaldan ibarət bir sosial paket istismara veriləcək.
"Teleradio" İB-nin proqnozlarına görə, ümumilikdə ilin sonunadək respublika ərazisinin 50 faizi teleyayımın rəqəmsal standartı ilə əhatə olunacaq. Azərbaycanda rəqəmsal yayım standartına tam keçid isə 2013-cü ildə nəzərdə tutulub.
