Azərbaycan, Bakı, 20 sentyabr /Trend, müxbir H.Vəliyev/
Azərbaycan Rabitə və İnformasiya Texnologiyaları Nazirliyinin "Aztelekom" İstehsalat Birliyi Gəncə telekommunikasiya qovşağının (TKQ) elektronlaşdırılması üzrə işləri başa çatdırmaq üzrədir. Bu barədə Trend-ə bazar ertəsi Gəncə TKQ rəisinin köməkçisi Elşad Əliyev bildirib.
Əliyevin sözlərinə görə, Gəncənin stasionar rabitə şəbəkəsinin tam elektronlaşdırılması yaxın vaxtlarda başa çatmalı olan 54 və 55 saylı ATS-lər elektron şəklə düşəndən sonra gözlənilir. Onlardan hər biri 10 min abonentə xidmət göstərir.
"İndi bu ATS-lərdə NGN avadanlığının quraşdırılması üzrə işlər artıq başa çatıb və plana əsasən, onların yaxın 15-20 gündə daxil olacaq kabel xətlərinin çəkilməsindən sonra istismara verilməsi gözlənilir. NGN avadanlığının tədarükçüsü qismində Çinin "Huawei Technologies" şirkəti çıxış edir", - Əliyev bildirib.
Bundan əvvəl Əliyevin dediyinə görə, ATS-in tam elektronlaşmasından sonra Gəncənin stasionar rabitə şəbəkəsinin nömrə tutumu yeddirəqəmli nömrələmə sisteminə keçiriləcək. Yeddirəqəmli nömrələmə sisteminə keçməklə, Gəncə şəhərinin telefon nömrələri "5" indeksi ilə başlayacaq (554-xx-xx, 555-xx-xx və s.). Yeni nömrələmə sistemi operatora ATS-in nömrə tutumunun resursunu artırmağa imkan verəcək və bu da öz növbəsində boş nömrələrin çatışmazlıq problemini həll edəcək.
Gəncə Bakı, Sumqayıt və Naxçıvandan sonra infrastrukturun inkişafının yeddirəqəmli nömrələmə sistemini tələb etdiyi dördüncü şəhər olacaq.
Hazırda Gəncə TKQ-nin ərazisində səkkiz avtomatlaşdırılmış telefon stansiyası (ATS 53/54/55/56/57/58) və iki xidmət zonasına bölünən və ayrı-ayrılıqda funksiya daşıyan 59 saylı iki ATS fəaliyyət göstərir. İlin sonunadək telekommunikasiya qovşağı üzrə ATS-lərin sayı 12-yə çatacaq.
