Azərbaycan, Bakı, 14 dekabr /Trend, müxbir H.Vəliyev/
Ukraynanın mobil rabitə operatoru Azərbaycan istiqamətində daxil olan zənglərin qiymətini azaldır. Bu barədə Ukraynanın Antiinhisar Komitəsinin məlumatında deyilir.
Bu barədə operator Ukraynanın Antiinhisar Komitəsinə məktubunda məlumat verib. Burada göstərilir ki, operator Azərbaycan, Qazaxıstan, Qırğızıstan, Tacikistan, Türkmənistan, Özbəkistan və digər ölkələr istiqamətində daxil olan zənglərin qiymətini 40 faiz azaltmağı planlaşdırır.
Bu gün "Kiyevstar" abunəçiləri üçün yuxarıda göstərilən ölkələrə gedən zənglərin qiyməti 35 qrn/saniyə (1 qrivna 0,1003 manata bərabərdir), daxil olanların dəyəri isə 40 qrn/saniyədir.
Sentyabrın sonlarında Ukraynanın Antiinhisar Komitəsi mobil rabitə operatorlarına rouminq xidmətləri üzrə tarifləri əsaslandırılmış səviyyəyə gətirilməsini tövsiyyə edib. MDB ölkələrində rouminq tariflərinin planlaşdırılan azaldılması barədə "MTS-Ukrayna" şirkəti də bildirib.
Bu yaxınlarda Rusiyanın mobil rabitə operatorlarının (MTS, "VımpelKom" və "MeqaFon") dekabrın 1-dən rouminq xidmətləri üzrə tariflərin xeyli azaldılması təklifi ilə çıxış etmələri bu məsələyə aktuallıq gətirib.
Rusiyanın mobil rabitə operatorlarının qarşısına qoyulan məsələyə MDB ölkələrinin antiinhisar təşkilatlarının dövlətlərarası əməkdaşlığı çərçivəsində də baxılıb. Bu postsovet məkanında operatorlararası zənglərin tariflərinin azaldılması üzrə ümumi strategiyanın işlənib hazırlanmasına imkan verir.
Operatorlararası rouminq tariflərinin Avropa Komissiyası tərəfindən nizamlandığı Avropa İttifaqı ölkələrində də oxşar strategiya tətbiq edilir ki, bu da Aİ daxilindəki abunəçilər üçün aşağı tariflərin müəyyən edilməsinə imkan verir.
Rouminq tarifləri qiymətlərin rouminq-tərəfdaşlarla operatorlararası birləşdirilməsi hesabına əldə olunur. Onların azaldılması rouminq-abunəçilərə əlverişli qiymətlərlə xidmət göstərməyə şərait yaradır.
Azərbaycanın Rabitə və İnformasiya Texnologiyaları Nazirliyi artıq ölkənin mobil rabitə operatorlarına rouminq tariflərinin mərhələli azaldılmasının bir neçə variantını təklif edib.
Azərbaycanın Rabitə və İnformasiya Texnologiyaları Nazirliyinin Maliyyə, uçot və iqtisadi analiz şöbəsinin rəhbəri Rəşad Nəbiyevin sözlərinə görə, operatorlara MDB ölkələri üçün tariflərin azaldılmasına başlamaq təklif olunub.
Azərbaycanın mobil rabitə operatorları operatorlararası birləşmələrin nizamlanmasına başlamağı məqsədəuyğun hesab edirlər.
"Onların təsdiqləmələrinə görə, MDB ölkələrində bu və ya digər xidmətlər üzrə razılaşma əldə etməyin çox asan və çox mürəkkəb olduğu operatorlar var. Avropada uğurun rəhni təkcə istifadəçilər üçün son tariflərin nizamlanması deyil, həm də operatorlararası birləşmələr faktıdır. Biz hesab edirik ki, MDB ölkələrində belə qarşılıqlı fəaliyyət və müvafiq olaraq mexanizmlərin tənzimlənməsi təəssüf ki, yoxdur. Buna baxmayaraq, məhz MDB rouminq tariflərinin səmərəli nizamlanması üçün çox işlər görməyin mümkün olmasına əsaslanaraq, elə həmin platforma kimi xidmət göstərə bilər", - Nəbiyev bildirib.
Bu gün Regional Rabitə Əməkdaşlığı (RRƏ) çərçivəsində işçi qrup yaradılıb və bu qrup mobil rabitə operatorlarının təqdim etdikləri rouminq xidmətləri üzrə tariflərin aşağı salınmasına dair məsələlərin həlli ilə məşğul olur. Belə təşkilat çərçivəsində qərarların qəbul edilməsi öz səmərəsini verə bilər, çünki bu qurumun tərkibinə daxil olan rabitə administrasiyaları mobil rabitə operatorlarına təsir imkanlarına malikdirlər.