Azərbaycan, Bakı, 14 yanvar /Trend, müxbir H.Vəliyev/
Azərbaycanda elektron hökumət sahəsində mövcud 20 xidmətin 10-dan çoxu tətbiq edilir. Bu barədə cümə günü rabitə və informasiya texnologiyaları nazirinin müavini Elmir Vəlizadə bildirib.
Nazir müavini qeyd edib ki, bu günədək "Elektron hökumət"in əsas komponentləri yaradılıb və hazırda onların vahid platformaya birləşdirilməsi imkanlarına baxılır.
Vəlizadənin sözlərinə görə, ötən il Azərbaycan üçün iqtisadiyyatın bütün sahələrində, eləcə də informasiya-kommunikasiya sahəsində uğurlu il olub.
Azərbaycanda 2010-2012-ci illər üzrə "Elektron hökumət Dövlət Proqramı" qəbul edilib.
Bu gün Azərbaycanda "Elektron hökumət" konsepsiyasının reallaşdırılmasına böyük önəm verilir. Onun əsas məqsədi hökumətin vətəndaşlar və biznes sektoru ilə qarşılıqlı fəaliyyətinə yardım etməkdir. Bu konsepsiya çərçivəsində təqdim olunan xidmətlər ölkə vətəndaşlarının müəyyən tapşırıqları yerinə yetrirərkən az vaxt itirmələrinə imkan verir.