Azərbaycan, Bakı, 14 yanvar /Trend, müxbir H.Vəliyev/
Azərbaycan Dövlət Sosial Müdafiə Fondu elektron xidmətlərin tətbiqi və effektiv təhlükəsizlik sisteminin qurulması üçün qabaqcıl ölkələrin təcrübəsini öyrənir. Bu barədə cümə günü Dövlət Sosial Müdafiə Fondunun nümayəndəsi Oqtay İbrahimov deyib.
İbrahimovun sözlərinə görə, hazırda Fondun nümayəndə heyəti Niderlanddadır, gələn həftə isə Polşa və Finladiyaya səfər gözlənilir. "Sonuncu elektron xidmət sahəsində idarəetmə və informasiya təhlükəsizliyi sisteminin yüksək səviyyədə təşkil olunduğu ölkələrdən biridir", - o deyib.
"Elektron xidmətlərin tətbiqi ilə informasiya təhlükəsizliyini artırmaq vacibdir. Biz bunu dərk edirik və istənilən riski minimuma endirmək üçün əlimizdən gələni edirik", - İbrahimov qeyd edib.
Onun sözlərinə görə, Fond fəaliyyəti bilavasitə informasiya texnologiyaları sahəsi ilə bağlı olan yerli inteqrator şirkətlərlə əməkdaşlıq etməyə hazırdır.
