Azərbaycan, Bakı, 25 yanvar / Trend, müxbir H.Vəliyev /
Azərbaycanın kompyuter bazarı son altı il ərzində 6,5 dəfə böyüyüb. Bu barədə Azərbaycan Rabitə və İnformasiya Texnologiyaları Nazirliyindən Trend-ə verilən məlumatda deyilir.
Nazirliyin məlumatında bildirilir ki, yanvarın 1-nə olan məlumata görə, Azərbaycanda hər 100 nəfərə 15 personal kompyuter (PK) düşür ki, bu da 2009-cu ilin göstəricisindən 25 faiz çoxdur.
Nazirliyin statistikasına görə, 2005-ci ildə hər 100 nəfərə düşən PK-nın sayı 2,3 ədəd təşkil edib. 2006-cı ildə bu göstərici 3,1 ədəd, 2007-ci ildə dörd ədəd, 2008-ci ildə səkkiz, 2009-cu ildə 12 ədəd olub.
İT bazarı iştirakçılarının fikrincə, 2010-cu ildə Azərbaycandakı portativ kompyuterlər bazarında artım təxminən 20 faiz təşkil edib.
Kompyuter bazarı iştirakçılarının özləri 2010-cu ili müsbət qiymətləndirirlər. Azərbaycanda riteyl yaxşı inkişaf edib. 2010-cu ildə portativ kompyuterlərin satışında əhəmiyyətli artım olub. 2011-ci ildə kompyuter bazarının inkişaf templərinin saxlanacağı gözlənilir ki, buna da ilk növbədə "Elektron Azərbaycan" Dövlət Proqramının həyata keçirilməsi kömək edir.
Azərbaycanın kompyuter bazarının inkişafında "Xalq kompyuteri" layihəsi xüsusilə mühüm rol oynayır. Layihə hər bir azərbaycanlı ailəsinin bu texnika ilə təmin olunmasına yönəlib. Təkcə son bir il ərzində bu layihənin reallaşdırılmasına beş milyon manat sərmayə qoyulub, layihə çərçivəsində satılan kompyuterlərin sayı isə yanvarın 25-nə olan məlumata görə, 10 836 ədəd təşkil edir. Satılan personal kompyuterlərin böyük əksəriyyəti portativ qurğuların payına düşüür.