Azərbaycan, Bakı, 17 mart /Trend, müxbir H.Vəliyev/
Dünya İqtisadi Forumu (DİF) ölkələrin informasiya texnologiyalarından istifadə ilə bağlı növbəti illik araşdırmasını aparır. Bu barədə Trend-ə cümə axşamı Azərbaycan Rabitə və İnformasiya Texnologiyaları Nazirliyindən bildirilib.
Nazirliyin məlumatına görə, DİF-in növbəti hesabatı apreldə dərc ediləcək.
Hesabatın hazırlanmasında məqsəd internet şəbəkələrinin inkişafına təsir edən faktorların müəyyənləşdirilməsi, informasiya texnologiyalarının inkişafında tənzimləmə və biznes-infrastruktur faktorlarının təhlilindən ibarətdir. Hesabat ölkələrin ümumi inkişaf tempini və rəqabət qabiliyyətliliyinin potensialını da əks etdirir.
Son hesabata əsasən, Azərbaycan "şəbəkə hazırlığı indeksi" (Networked Readiness Index 2009-2010, NRI) üzrə dünyada 64-cü yerdə olub və bütün MDB ölkələrini qabaqlayaraq regionda öz liderlik mövqeyini möhkəmlədib.
Bununla yanaşı, Azərbaycan təkcə MDB ölkələrini deyil, həm də Polşa (65-ci yer), Türkiyə (69), Misir (70), Meksika (78) kimi ölkələri də qabaqlayıb. Keçmiş Sovet İttifaqı ölkələrindən Rusiya 80-ci, Qazaxıstan 68-ci, Ukrayna 82-ci, Gürcüstan 93-cü, Ermənistan 101-ci yeri tutub.
Məruzə ümumilikdə dünyanın 133 ölkəsini əhatə edir. Hesabatı tərtib edənlər xüsusilə qeyd ediblər ki, Azərbaycan MDB məkanında yeganə ölkədir ki, NRI-ın reytinqinin ilk yarısına düşə bilib.
DİF-in hesabatında əhalinin gəlir səviyyəsinə əsasən dövlətlərin "şəbəkə hazırlığı" üzrə renkinqi ayrıca tərtib edilir. Gəliri eyni səviyyədə olan ölkələr arasında Azərbaycan əvvəlki hesabatda dünyada 6-cı yeri tutmuşdu.
NRI-ın reytinqi üç baza qrupunda birləşdirilən 10 parametrə əsasən tərtib edilir: texnologiyadan istifadə üçün əlverişli mühit komponenti, İKT-dən istifadəyə hazırlıq komponenti və İKT-dən istifadə səviyyəsinin komponenti.
Əvvəllər dərc edilən hesabatda DİF-in ekspertləri dövlətlərin İKT-dən istifadə üzrə hazırlığını da qiymətləndiriblər. Hökumətin təşviqlə bağlı uğurlarının parametrləri üzrə Azərbaycan İKT-si 30-cu yerdə, İKT-dən istifadə və idarəetmənin effektivliyi üzrə 54-cü yerdə, dövlət hakimiyyəti orqanlarında İKT-nin olması üzrə 31-ci yerdə olub. Ümumilikdə İKT-dən dövlət səviyyəsində istifadə parametri üzrə Azərbaycan dünyada 49-cu yeri tutub.
Hesabatda qanunvericilik və İKT sahəsinin dövlət tənzimlənməsi də yüksək qiymətləndirilib. DİF-in son hesabatına əsasən, Azərbaycan məktəblərdə internetdən istifadə üzrə 56-cı yeri tutub. Biznesin innovasiya potensialı reytinqində ölkə 29-cu yerdə olub.