...

Azərbaycanda biometrik eyniləşdirmə sisteminin işə salınması üçün proqram təminatı hazırlanır

Telekommunikasiya Materials 23 Aprel 2011 14:08 (UTC +04:00)

Azərbaycan, Bakı, 23 aprel /Trend, müxbir H.Vəliyev/

Azərbaycanda biometrik eyniləşdirmə sisteminin işə salınması üçün proqram təminatının hazırlanması üzrə işlər görülür. Bu barədə şənbə günü Trend-ə layihəyə yaxın mənbə məlumat verib.

Yeni proqram təminatı şəxsiyyət vəsiqələri və xarici pasportlarla məlumatların tutuşdurulub yoxlanması üçün istifadə olunan hazırkı proqram təminatını əvəz edəcək. Yeni soft-un əsas funksiyası biometrik pasportların verilmə sistemi tərəfindən elektron pasportlardakı məlumatların tutuşdurulub yoxlanılması imkanı olacaq.

Biometrik pasportlarda bütün müasir müdafiə vasitələrindən istifadə olunacaq, bu, onun saxtalaşdırılması imkanını minimuma endirəcək. Biometrik eyniləşdirmə sisteminin hazırlanması ilə İsveçrənin "Trüb AG" şirkəti məşğul olacaq.

Azərbaycan hökumətinin eyniləşdirmənin biometrik sisteminə keçidlə bağlı layihə üzrə bütün tələb və təklifləri "Trüb AG" tərəfindən qəbul edilib. Layihəyə əsasən, biometrik pasportlar vətəndaşlara 2012-ci ilədək veriləcək. Layihədə biometrik pasportların üç növünün verilməsi nəzərdə tutulub: ümumvətəndaş, xidməti və diplomatik. Azərbaycanın biometrik pasportları dünyada mövcud olan pasportların həm dizayn, həm də məxfiliyi və digər elementləri baxımından onu daha yaxşı qorumaqdan geri qalmayacaq.

Layihəyə uyğun olaraq, Azərbaycanda yeni nəsil pasportların fərdiləşdirilməsi ilə məşğul olacaq mərkəzlər yaradılacaq. Ölkədə məlumat bazası yaradılacaq, biometrik göstəricilər gələcəkdə məlumatların pasportun xüsusi biometrik səhifəsinə salınması ilə pasportun içərisinə sıxılmış çiplərə daxil ediləcək.

Bu sistemin tətbiqi Azərbaycanda "bir pəncərə" prinsipinin rahat və optimal tətbiqinə gətirib çıxaracaq. Bu, ilk növbədə, bürokratik elementləri aradan qaldırmağa, arayışların sayını və onların təsdiqlənməsi vaxtını azaltmağa imkan verəcək. Vətəndaş biometrik şəxsiyyət vəsiqəsinə malik olmaqla, bütün məlumat bazalarında yazılı təsdiq və ya arayış almadan keçə biləcək.

Yeni nəsil pasportlarda onun sahibi haqqında bütün lazımi informasiyanın yüklənəcəyi mikroçip olacaq. Biometrik pasportların tətbiqində əsas məqsəd ölkələrin mütəşəkkil cinayətkarlıqla birgə mübarizəsinin təminidir.

Azərbaycanda vətəndaşlara biometrik pasportların verilməsi prosedurunu tənzimləyən yekun sənədin qəbul edilməsi gözlənilir. Yeni nəsil pasportların verilməsi 2012-ci ilin sonunadək başlanacaq. Biometrik pasportların nümunələri İsveçrənin "Trüb AG" şirkəti tərəfindən hazırlanacaq.

"Trüb AG" həmçinin uzunmüddətli perspektivdə reallaşdırdığı şəbəkələrin texniki xidmətinin və saxlanmasının təmin edilməsi üçün məsuliyyət daşıyır. Şirkət Azərbaycan hakimiyyətini şəxsiyyəti təsdiq edən sənədlərlə tanışlıq prosesi, eləcə də məlumatların toplanması, açıq açarlar infrastrukturundan (PKI - Public Key Infrastructure) istifadə zamanı dəstəkləyəcək. PKI sistemi çipdəki məlumatların məxfiliyinin (pasport sahibi haqqında fərdi məlumatları, üzün və iki barmağın izinin təsvirləri) qorunmasını təmin edəcək ümummilli sertifikatlaşdırmanın yaradılması üçün tətbiq ediləcək.

Xəbər lenti

Xəbər lenti