Azərbaycan, Bakı, 9 avqust / Trend , müxbir H.Vəliyev/
Azərbaycan tərəfi, ABŞ-ın US Ex-Im şirkəti və Fransanın "BNP Paribas" bankı yaxın günlərdə Azərbaycanın ilk telekommunikasiya peyki "Azerspace"in tikintisinə dair kredit sazişi imzalayacaqlar. Bu barədə çərşənbə axşamı Trend-ə layihəyə yaxın mənbə deyib.
Saziş üçtərəfli olacaq. 116,6 milyon dollarlıq kredit Azərbaycana US Ex -Im tərəfindən Fransanın "BNP Paribas" bankından borc götürülən vəsaitlər hesabına veriləcək.
"Azerspace" peykinin istehsalının dəyəri 120 milyon dollardır. Bunun 85 faizi Azərbaycan tərəfinə US Ex -Im-in krediti kimi, yerdə qalan 15 faiz isə dövlət büdcəsinin vəsaitləri hesabına ödəniləcək.
Sövdələşmə vəsaitlərdən ikiillik müddətə istifadə etməklə və onillik ödəmə müddəti ilə maliyyələşdiriləcək. Hazırda kreditin faiz dərəcəsi üzrə danışıqlar aparılır.
"Azerspace" peykinin istehsalçısı qismində ABŞ-ın "Orbital Sciences Corporation" şirkəti çıxış edir. Peykin yerləşdiriləcəyi orbital mövqe isə Malayziyanın MEASAT peyk operatorundan icarəyə götürülüb.
Peykin orbitə çıxarılması ilə Fransanın "Arianspace" şirkəti məşğul olacaq.