Azərbaycan, Bakı, 6 sentyabr /Trend, müxbir H.Vəliyev/
Azərbaycanın İT şirkəti "Ultra" 1C mühasibat uçotu sistemini Maliyyə Nazirliyində tətbiq edib. Bu barədə Trend-ə şirkətin ticarət şöbəsinin rəisi Malik Rəşidov bildirib.
Onun sözlərinə görə, bu həll Azərbaycan dilinə, qanunvericiliyə və mühasibat uçotunun milli standartlarına tamamilə uyğunlaşdırılıb.
1C elastik quraşdırıla bilən bir sistemdir, onun köməyi ilə müəssisələrin fəaliyyətinin avtomatlaşdırılması sahəsində bir çox məsələlərin həlli mümkündür. Sistem sadə menyusu ilə fərqlənir, onun bəndləri uçot bölmələrinə görə qruplaşdırılıb.
"Ultra" şirkəti tərəfindən bundan əvvəl həmin nazirlikdə elektron sənəd mübadiləsi sistemi də tətbiq edilib. Layihə idarədə kağız-sənəd işlərini elektron nüsxəyə keçirməni nəzərdə tuturdu.