Azərbaycan, Bakı, 8 sentyabr /Trend, müxbir H.Vəliyev/
Azərbaycan Rabitə və İnformasiya Texnologiyaları Nazirliyinin "Teleradio" İstehsalat Birliyi Tərtər rayonunda yeni televiziya qülləsinin tikintisini tamamlayır. Bu barədə Trend-ə cümə axşamı İb-nin baş direktoru Əflatun Şərifov deyib.
Onun sözlərinə görə, yeni teleqüllənin 20 gün ərzində işə salınacağı gözlənilir. Hazırda ən vacib məsələ Azərbaycan televiziya kanallarının efir yayımını Dağlıq Qarabağın şimal hissəsində, həmçinin Qarabağ regionunun aran hissəsində (Ağdam, Bərdə və digər rayonlarda) təmin etmək məqsədilə obyektin zəruri texniki təchizatının quraşdırılmasıdır.
"Gələcəkdə telestansiyanın işi elektron formata keçiriləcək ki, bu da öz növbəsində erməni telekanallarının Azərbaycanın efir sahəsinə soxulmasının qarşısını almağa imkan verəcək", - Şərifov bildirib.