Azərbaycan, Bakı, 30 sentyabr /Trend, müxbir H.Vəliyev/
Hesabatlılığın tamamilə elektron sistemə keçirilməsi Azərbaycan Dövlət Sosial Müdafiə Fondunun (DSMF) işçilərinin sayının 40 faiz azaldılmasına gətirib çıxaracaq. Trend-in məlumatına görə, bunu cümə günü jurnalistlərə Fondun rəhbəri Səlim Müslümov deyib.
"2012-ci ildə həyata keçiriləcək elektron qarşılıqlı əlaqəyə tamamilə keçidin tamamlanması üzrə işlər işçilərin sayının təxminən 40 faizinin ixtisara salınması məsələsini aktual edəcək", - Müslümov bildirib.
Onun sözlərinə görə, pensiyaların elektron sistemlə hesablanmasına keçiddən sonra artıq böyük sayda işçilərə ehtiyac olmayacaq.
Artıq oktyabr ayının 1-dən etibarən Bakı, Abşeron yarımadası və Sumqayıtda hesabatlılıq elektron formada qəbul olunacaq. Buna paralel olaraq, hesabatlılığı kağız daşıyıcılarında da təqdim etmək mümkün olacaq. Regional səviyyədə elektron hesabatlılıq - həm IV rübün nəticələri, həm də illik hesabatlılıq - gələn ildən etibarən qəbul ediləcək.
Elektron hesabatlılığın təqdim olunması üçün sahibkarlar müvafiq şəkildə parol, kod və şifr almalıdırlar.
