Azərbaycan, Bakı, 2 noyabr /Trend, müxbir H.Vəliyev/
Yanvar-sentyabrda Azərbaycanın İKT və poçt rabitəsi sektoruna 140 milyon manat investisiya qoyulub ki, bu da ötən ilin analoji dövr göstəricisini 22 faiz üstələyir və respublika iqtisadiyyatına yatırılan investisiyaların ümumi həcminin 1,8 faizini təşkil edir. Trend-in məlumatına görə, bu barədə çərşənbə günü dərc edilən Azərbaycan Rabitə və İnformasiya Texnologiyaları Nazirliyinin doqquz ayın yekunları ilə bağlı hesabatında deyilir.
Məlumata əsasən, qurumun müəssisələri və strukturları tərəfindən qoyulan investisiyaların həcmi 70,1 milyon manat təşkil edib.
Doqquz ayın yekunlarına əsasən, ölkə üzrə ümumi nömrə tutumu 19908 nömrə olan yeni ATS-lər istismara verilib. Qurumun statistik göstəricilərinə əsasən, hazırda respublika üzrə ATS şəbəkəsinin nömrə tutumu 1687208 ədəd təşkil edir.
Regional telekommunikasiya qovşaqlarının yenidən qurulmasına 3,4 milyon manat, Bakı telefon şəbəkəsinin modernləşdirilməsinə isə 9,7 milyon manat investisiya qoyulub.
Hazırda bütün respublika üzrə hər 100 nəfərə düşən telefonların ümumi sayı 16,3 ədəddir. Bu göstərici paytaxtda 35,1 ədəd, ölkənin digər regionlarında 10,8 ədəd, kənd yerlərində isə 7,1 ədəd təşkil edir.
Doqquz ayda Azərbaycanın mobil rabitə operatorlarının abunə bazası 51895 abunəçi artaraq 9629000 abunəçi təşkil edib.
Azərbaycan mobil rabitəyə daxil olma səviyyəsinə görə orta dünya göstəricilərini 35 faiz qabaqlayır. Hazırda mobil rabitəyə daxil olma səviyyəsi üzrə orta dünya göstəricisi 78 faiz təşkil edir.
Qurumun statistikasına əsasən, Azərbaycanda hər 100 nəfərə 105 mobil telefon düşür.
