Azərbaycan, Bakı, 29 dekabr /Trend, müxbir H.Vəliyev/
Nömrələrin köçürülməsi (MNP - Mobile Number Portability) üzrə xidmətlərin göstərilməsi qaydaları rəsmən Azərbaycan Ədliyyə Nazirliyində qeydiyyatdan keçib. Bu barədə cümə axşamı Trend-ə Azərbaycan Rabitə və İnformasiya Texnologiyaları Nazirliyindən məlumat veriblər.
Sənəd nazirlik tərəfindən mobil rabitə operatorları ilə birlikdə hazırlanıb.
Hazırda sistemin texniki tərkibinin hazırlanması və xidmətin istismara verilməsi üçün hüquqi məsələlərin qəbulu üzrə işlər aparılır. Gözlənilir ki, ondan istifadə gələn il operatorların şəbəkələrində mümkün olacaq.
Xidmət göstərmək üçün operatorlar öz şəbəkə infrastrukturlarını hazırlamalıdırlar. Xidmətin işə salınması hər üç GSM operatorları tərəfindən eyni zamanda həyata keçiriləcək.
MNP xidməti operatora ayrılan prefikslə birlikdə (050, 051, 055, 070 və 077) abonent nömrəsinin tam miqrasiyasını nəzərdə tutur. Bu, abonentlərə operatoru dəyişəcəyi təqdirdə, öz telefon nömrələrini saxlamaq imkanı verəcək ki, bu da onları öz yaxınlarını və işgüzar tərəfdaşlarını nömrənin dəyişilməsi barədə məlumatlandırmaqdan azad edəcək.
Nömrələrin köçürülməsi xidmətinin tətbiqi rəqabəti artıra bilər, belə ki, operatorlar öz əvvəlki abonentlərini saxlamaq üçün əlavə cəhdlər etməyə və yeni müştərilərin cəlb olunması üçün daha cəlbedici xidmətlər göstərməyə vadar olurlar.