Azərbaycan, Bakı, 21 yanvar /Trend, müxbir H.Vəliyev/
2010-cu illə müqayisədə 2011-ci ilin yekunları üzrə İKT sektoru və poçt rabitəsi üzrə gəlirlərin həcmi 13 faiz artaraq 1314,9 milyon manat təşkil edib. Trend-in məlumatına görə, bu barədə şənbə günü Rabitə və İnformasiya Texnologiyaları Nazirliyinin ötən ilin yekunları üzrə hesabatında deyilir.
2011-ci ildə respublikanın İKT sektoru üzrə artım tempi 2010-cu ilin göstəriciləri ilə müqayisədə 12,8 faiz, telekommunikasiya sektoru üzrə 9,8 faiz, İT sektoru üzrə 1,4 faiz, poçt sektoru üzrə 5 faiz təşkil edib.
İKT seltoru və poçt rabitəsi üzrə əldə edilən gəlirin 75,3 faizi özəl müəssisələrin payına düşüb. Sektor üzrə əldə edilən gəlirin ümumi həcminin 66,8 faizi mobil rabitə bazarının payına düşüb. Bu bazarın artım tempi 2010-cu ilin analoji göstəricisi ilə müqayisədə 3,6 faiz təşkil edib.
2011-ci ildə Azərbaycanın ÜDM-də İKT sektoru və poçt rabitəsinin gəlirinin həcmi 1,8 faiz olub. Nazirliyin məlumatına əsasən, qeyri-neft ÜDM-də bu sektorun gəlirləri 3,7 faiz təşkil edib.
Yanvarın 21-nə olan rəsmi məzənnə 0,7862 AZN/USD təşkil edir.
