Azərbaycan, Bakı, 14 fevral /Trend, müxbir H.Vəliyev/
Birinci rübün sonunadək Azərbaycanın daha iki nazirliyində elektron sənəd dövriyyəsi sistemi işə salınacaq. Bu barədə çərşənbə axşamı Trend-ə "Ultra" şirkətinin Marketinq şöbəsinin rəhbəri Malik Rəşidov bildirib.
Sənəd dövriyyəsinin elektron formata köçürülməsi üzrə işlər ölkənin Rabitə və İnformasiya Texnologiyaları və Təhsil nazirliklərində aparılır.
Rəşidovun sözlərinə görə, bu istiqamətdə işlərin xeyli hissəsi artıq həyata keçirilib. Layihənin reallaşdırılması nazirliklərdə kağız kargüzarlığını, kadr və maliyyə uçotunu daha rahat və operativ elektron formata keçirməyə imkan verəcək.
Nazirliklərdə məqsədli ünvanlar üzrə sənədləri operativ hazırlamağa və yaymağa icazə verən "Megapolis DocNet" platforması tətbiq edilir ki, bu da insan resurslarından və kağız daşıyıcılardan istifadənin səviyyəsini aşağı salır.
Ultra şirkəti bundan əvvəl ölkənin Maliyyə və İqtisadi İnkişaf nazirliklərində elektron sənəd dövriyyəsi sisteminin tətbiqi üzrə işləri başa çatdırıb.
"Hazırda respublikanın başqa dövlət müəssisələrində də elektron sənəd dövriyyəsi sisteminin tətbiqi üzrə danışqılar aparılır", - Rəşidov deyib.
