Azərbaycan, Bakı, 28 fevral / Trend, müxbir H.Vəliyev /
Naxçıvan Muxtar Respublikasının poçt şöbəsi əhaliyə maliyyə xidmətlərinin göstərilməsinə başlamağa hazırlaşır. Bu barədə Trend-ə "Azərpoct" MMC-dən deyilib.
Hazırda Muxtar Respublikanın poçt şöbələrində COLVIR avtomatlaşdırılmış korporativ-informasiya sistemlərinin tətbiqi üzrə işlər aparılır. "Azərpoct" MMC-nin mütəxəssisləri tərəfindən NMR-in poçt şöbələrinin maliyyə xidmətlərinin göstərilməsinə hazırlığının auditi keçirilib.
Muxtar Respublikanın poçt rabitəsi filiallarında və şöbələrində maliyyə xidmətlərinin tətbiqi həm şəhərlərdə, həm də rayonlarda mərhələli şəkildə həyata keçiriləcək.
Naxçıvan MR-in poçt şöbələri bank əməliyyatlarının (depozitlərin qəbulu və kreditlərin verilməsi istisna olmaqla) göstərilməsinə lisenziya aldıqdan sonra başlayacaqlar. Poçt şəbəkələrində maliyyə xidmətlərinin göstərilməsinin artıq ilin ikinci yarısında mümkün olacağı gözlənilir.
