Azərbaycan, Bakı, 24 iyun /Trend, müxbir H.Vəliyev/
"Smart Systems Technology" şirkəti Milli Gimnastika Arenası istiqamətində optik-lif magistral xətlərin çəkilməsinə başlayıb. Bu barədə bazar ertəsi Trend-ə şirkətin baş direktoru Sübhan Qaragözov deyib.
Onun sözlərinə görə, layihə "Paşa İnşaat" ilə əldə edilən razılığa əsasən həyata keçirilir.
"Smart Systems Technology" şirkəti Azərbaycan Gimnastika Federasiyasının İT tərəfdaşı seçilib.
Qaragözov bildirib ki, layihə çərçivəsində Milli Gimnastika Arenasının binasına iki istiqamətdə optik xətlərin quraşdırılması nəzərdə tutulur: "Magistral xətlərin ümumi uzunluğu 10 kilometr təşkil edəcək. Şirkət, həmçinin zəruri telekommunikasiya avadanlığının instalyasiyasını həyata keçirməyi öhdəsinə götürüb".
Layihənin tərtibatına və kabel infrastrukturun yaradılmasına iki ay vaxt ayrılıb, bundan sonra, razılığa əsasən, şirkət idman yarışları keçirilən zaman telekommunikasiya (internet xidmətləri, IP-telefoniya, IP-TV) və IT xidmətləri göstərəcək.
