...

Əfqanıstan özünün İKT sektorunun inkişafında Azərbaycanın iştirak imkanlarını öyrənir

Telekommunikasiya Materials 2 Sentyabr 2013 13:52 (UTC +04:00)
Azərbaycanın e-hökumət sahəsində qazandığı uğur bir çox inkişaf etməkdə olan ölkələrin diqqətini cəlb edir. Əfqanıstan hökuməti də Azərbaycanın bu sahədəki uğurunu örnək hesab etdiyindən BMT İnkişaf Proqramının (İP) hər iki ölkədəki nümayəndəliklərinin vasitəçiliyi ilə Azərbaycanın Əfqanıstana bu sahədə yardımına vasitəçilik etmək barəsində razılıq əldə olunub.
Əfqanıstan özünün İKT sektorunun inkişafında Azərbaycanın iştirak imkanlarını öyrənir

Azərbaycan, Bakı, 2 sentyabr /Trend, müxbir H. Vəliyev/

Azərbaycanın e-hökumət sahəsində qazandığı uğur bir çox inkişaf etməkdə olan ölkələrin diqqətini cəlb edir. Əfqanıstan hökuməti də Azərbaycanın bu sahədəki uğurunu örnək hesab etdiyindən BMT İnkişaf Proqramının (İP) hər iki ölkədəki nümayəndəliklərinin vasitəçiliyi ilə Azərbaycanın Əfqanıstana bu sahədə yardımına vasitəçilik etmək barəsində razılıq əldə olunub. Trend-in məlumatına görə, bu barədə bazar ertəsi BMT İP-nin məlumatında deyilir.

Əfqanıstan İslam Respublikasının rabitə və informasiya texnologiyaları naziri Əmirzay Sanginin başçılıq etdiyi nümayəndə heyətinin Azərbaycan hökuməti və BMT İP-nin birgə təşkil etdiyi 9-15 iyun 2013-cü il tarixlərindəki səfər bu istiqamətdə atılmış ən mühüm addımlardan biridir.

Bu səfərin nəticəsi olaraq, Azərbaycan və Əfqanıstan Respublikalarının Rabitə və İnformasiya Texnologiyaları Nazirliyi, Xarici İşlər Nazirliyinin Azərbaycan Respublikasının Beynəlxalq İnkişafa Yardım Agentliyi (AİDA) və BMT İP-nin hər iki ölkə üzrə nümayəndəliklərinin əməkdaşlarından ibarət İşçi qrupu yaradılıb.

Əfqanıstan Respublikası rabitə və informasiya texnologiyaları nazirinin müavini Barialay Hassamın rəhbərlik etdiyi nümayəndə heyəti Azərbaycan və Əfqanıstan arasında İKT sahəsində əməkdaşlığa dair İşçi qrupun birinci görüşündə iştirak etmək üçün Azərbaycanda səfərdədir. 29 avqust - 2 sentyabr tarixində keçiriləcək İşçi Qrupun görüşünün məqsədi Əfqanıstanın İKT sahəsindəki inkişafında Azərbaycanın iştirak imkanlarını, Əfqanıstanın İKT sahəsində mövcud təlabatlarını, bu sahədə əsas istiqamətlərin müəyyən edilməsini və Əfqanıstanda həyata keçirilə biləcək layihələri müzakirə etməkdir. Səfər çərçivəsində Əfqanıstan nümayəndə heyəti Azərbaycan Respublikası rabitə və informasiya texnologiyaları nazirinin müavini Elmir Vəlizadə, AİDA Agentliyinin direktoru Əşrəf Şıxəliyev və BMT İP-nin Azərbaycan nümayəndəliyinin Rezident Nümayəndəsinin müavini Nato Alhazişvili ilə görüşlər keçirəcək.

Qeyd etmək lazımdır ki, 2012-ci ildə Azərbaycan Respublikası Xarici İşlər Nazirliyinin Beynəlxalq İnkişafa Yardım Agentliyi BMT İP vasitəsi ilə Əfqanıstanın inkişafına yardım üçün 150 000 ABŞ dolları məbləğində vəsait ayırmışdır. Bu təşəbbüs Azərbaycanın regional və qlobal problemlərin həllində fəal iştirakçılıq öhdəliyini bir daha göstərir. Bu əməkdaşlıq Əfqanıstanın stabilliyi və iqtisadi inkişafında Azərbaycanın mühüm rol oynamasına şərait yaradır.

30 avqust tarixində "Əfqanıstanda elektron hökumətin qurulması" layihəsi çərçivəsində RİTN-də Azərbaycan-Əfqanıstan İşçi qrupunun ilk görüşü keçirilib. Görüşdə iki ölkə arasında əməkdaşlığın genişləndirilməsi üzrə müzakirələr aparılıb, Əfqanıstanın İKT sahəsində mövcud ehtiyacları araşdırılıb, gələcəkdə həyata keçiriləcək tədbirlər müəyyənləşdirilib və birgə protokol imzalanıb.

Məqalədə:
Xəbər lenti

Xəbər lenti