Azərbaycan, Bakı, 27 mart / Trend, müxbir E.Əliyev /
Avropa Yenidənqurma və İnkişaf Bankı (AYİB) Azərbaycanda İKT infrastrukturunun təkmilləşdirilməsinin davam etdirilməsinin vacibliyini qeyd edir.
AYİB-in martın 12-də Direktorlar Şurası tərəfindən təsdiqlənən və dünən yayılan İKT sahəsində strategiyasında deyilir: "Ölkə qarşısında bu sahədə duran əsas çağırışlar bunlardır: telekommunikasiya infrastrukturunun, eləcə də genişzolaqlı internetə çıxışin, o cümlədən tənzimləyici çərçivələrin inkişafının davam etdirilməsi, eləcə də İKT sektorunun müstəqil tənzimləyicinin yaradılması, dövlət stasionar rabitə xidmətləri provayderi "Aztelekom" şirkətinin özəlləşdirilməsi".
Bankın mütəxəssisləri qeyd edirlər ki, Azərbaycanda mobil rabitənin və genişzolaqlı internetin nüfuzetmə səviyyəsi əhəmiyyətli illik artım nümayiş etdirir.
Sənəddə deyilir: " Bu sahədə xidmətlərin inkişafı yerli şəbəkələrin və biznesi internetlə bağlı olan şirkətlərin hüquqi statusunu müəyyən edəcək qanunvericiliyin kifayət etməyən inkişafı ilə çətinləşir".
AYİB analitikləri bildirirlər ki, Azərbaycan, Gürcüstan, Rusiya və Ermənistan postsovet məkanında 20 faizdən yuxarı səviyyədə genişzolaqlı internetin (stasionar və mobil) nüfuzetməsi üzrə liderlik edirlər.
Strategiyanın mətnində deyilir: " Azərbaycanda və Ukraynada internetə girişin genişlənilməsi, elektron sənəd dövriyyəsi və imzaların tətbiqi, kibercinayətlə mübarizə, domen adların qeydiyyatının asanlaşdırılması və şəxsi məlumatların müdafiəsi sahəsində əsas addımlar atılıb. Regionun bütün ölkələrində bazar hüquqi cəhətdən açıqdır. Bundan başqa, Azərbaycanda, həmçinin Gürcüstanda, Moldovada, Ukraynada və Ermənistanda qanunvericilik normalarının Avropa İttifaqının tənzimləmə normaları ilə uyğunlaşdırılması üzərində fəal iş gedir".
