Azərbaycan, Bakı, 4 sentyabr /Trend, müxbir Hüseyn Vəliyev/
Rabitə və Yüksək Texnologiyalar Nazirliyi (RYTN) yüksək texnologiyalı məhsulların azad ticarət zonasının yaradılması üzrə təkliflər hazırlayır. Bunu cümə axşamı Trend-ə nazirlikdən deyiblər.
Hazırda bu layihənin reallaşdırılması imkanları üzrə bir neçə ölkə ilə danışıqlar aparılır. Nazirlikdən qeyd ediblər ki, layihə, ilk növbədə, İT bazarının genişləndirilməsinə yönəldilib: "Söhbət biznes sektorun İT məhsulların və xidmətlərin müəyyən növləri üzrə azad ticarət aparmaq imkanının təqdim edilməsindən gedir".
RYTN-dən, həmçinin xarici bazarlara ekspansiya məsələsində lokal İT şirkətlərə yardım etməyə hazır olduqlarını bildiriblər.
Nazirlikdən hesab edirlər ki, lokal İT şirkətlər çox vaxt bu məsələdə müəyyən problemlərlə üzləşirlər və bununla əlaqədar RYTN mövcud vəziyyətin həllində əlindən gələn köməyi etməyə hazırdır: "Burada söhbət maliyyə yardımının göstərilməsindən və vergi, gömrük rüsumları ilə bağlı məsələlərin həllinə köməkdən gedə bilər. Nazirlik baxılması üçün müvafiq təkliflər təqdim ediləcəyi təqdirdə biznesi dəstəkləməyə hazırdır".
