Azərbaycanın rabitə və informasiya texnologiyaları naziri Əli Abbasov dekabrın 5-də işgüzar səfərlə İtaliyaya yola düşüb. Nazirlikdən Trend ə verilən məlumata görə, səfərdə məqsəd İtaliya ilə Azərbaycan arasında "Şəbəkənin təhlükəsizliyi sahəsində əməkdaşlıq haqqında" sazişin imzalanmasından ibarətdir.
Dövlət strukturunda bildirilib ki, səfər çərçivəsində nazir Roma yaxınlığındakı texnoloji və tədqiqat parkı ilə tanış olacaq, Azərbaycanda texnoparkların yaradılmasında İtaliyanın təcrübəsinin tətbiq edilməsi üzrə danışıqlar aparacaq.
Həmçinin, İatliya senatının "İctimai işlər və rabitə" komissiyasının sədri Luici Qrillə, Deputatlar Palatasının nəqliyyat, poçt və telekommunikasiya üzrə daimi komissiyasının sədri Ancelo Sanza, La Sapienza universitetinin rektoru Renato Qvarini və İtaliyanın rabitə elmləri fakultələrinin dekanlar konfederasiyasının prezidenti Mario Mortselini ilə görüşlərin keçirilməsi gözlənilir.
Dekabrın 8-də başa çatacaq görüş çərçivəsində Əli Abbasov Azərbaycanın rabitə sahəsinə investisiyaların cəlb olunması məqsədilə Rabitə və İnformasiya Texnologiyaları Biznes-Assosiasiyası Federasiyasının rəhbərliyi, o cümlədən Federasiyanın tərkibinə daxil olan iri korporasiyaların rəhbər şəxsləri ilə görüşəcək.