Smart System Technology şirkəti Azərbaycan Beynəlxalq Bankı ilə ATS-də bankomatlar, POS terminallar, informasiya köşkləri və birbaşa rabitə xəttlərinin çəkilməsi üzrə müqavilə imzalayıb. Bu barədə Trend ə şirkətin marketinq şöbəsinin rəhbəri Sübhan Qaragöz məlumat verib.
Onun sözlərinə görə, eləcə də Barmek Azerbaijan şirkəti ilə real vaxt rejimində əməliyyatların həyata keçirilməsi üçün "Maştağa" və "Qaraj" şöbələrinin korporativ şəbəkəyə qoşulması üzrə razılaşma imzalanıb.
Azərnəqliyyatbank ASC ilə də bankın 3 saylı filialının korporativ şəbəkəyə və Smart Bank avtomatlaşdırılmış bank sisteminə birləşdirilməsi üzrə müqavilə imzalanıb. Bank həmçinin, bu sistemin imzalanan razılaşma əsasında Turanbank ASC-nin Tovuz filialında tətbiq olunması üzrə də işlər aparır.
Smart System Technology bu sistemi Azərbaycanın İpoteka Fondunda da tətbiq etməyə çalışır və bunu ilin sonuna kimi başa çatdırmaq niyyətindədir.