Azərbaycan Elmlər Akademiyasının İnformasiya Texnologiyaları İnstitutu (İTİ) Azərbaycanda informasiya-kommunikasiya texnologiyalarının inkişafı üzrə dövlət proqramı çərçivəsində yeni sistemin hazırlanması üzrə işləri başa çatdırıb. Yeni sistem üzrə tədbirlər Teleradio İstehsal birliyi ilə 2005-ci ilin iyul ayında imzalanmış saziş əsasında həyata keçirilib.
İnstitut şöbəsinin rəisi Qəzənfər Orucovun Trend ə verdiyi xəbərə görə, sazişin əsas məqsədi Geography Information System (GIS) texnologiyası əsasında radio-televiziya stansiyalarında yeni layihəli antena-fider qurğularının əhatə zonasının modelləşdirilmə sisteminin hazırlanmasıdır.
Layihədə SR-4 proqram təminatı əsasında Azərbaycanın rəqəmli relyef xəritəsini nəzərə almaqla yayım zonasını modelləşdirən və vizuallaşdıran proqram təminatının hazırlığı nəzərdə tutulub.
Bu sistemin tətbiqi radio-televiziya qəbuledicilərinin quraşdırılması üçün optimal yerin müəyyən olunmasını mümkün edir. Arzu edilməyən kanalların Azərbaycanın televiziya məkanına girməsi problemi həll olunacaq. Yaxın zamanlarda sistem Teleradio İB-yə təqdim olunacaq.
