Oktyabrda keçiriləcək "BakuTel-2006" telekommunikasiya və informasiya texnologiyaları üzrə XII beynəlxalq sərgidə iştirak edəcəklərini bir sıra ölkənin rabitə administrasiyalarının rəhbərləri təsdiqləyiblər. Azərbaycan Rabitə və İnformasiya Texnologiyaları Nazirliyindən Trend ə verilən məlumata görə, iştirak edəcəklərini Türkiyə, Sloveniya, Moldova, Ukrayna, Çexiya və başqaları təsdiqləyib.
"BakuTel-2006"da həmçinin iri İT-korporasiyaların: "Cisco Systems", "Microsoft", "Hewlett Packard" (HP), "Ericsson", "Intel", "Alcatel" və sairənin nümayəndə heyətlərinin iştirakı gözlənilir.
Bundan başqa, həmin dövrdə Bakıya Elmi Parkların Beynəlxalq Assosiasiyasının (International Association of Science Parks IASP) baş direktoru Luis Sanzın səfəri gözlənilir. O, sərgi çərçivəsində "Xüsusi iqtisadi zonalar: Azərbaycanda dayanıqlı inkişafın yeni istiqamətləri" mövzusunda keçiriləcək beynəlxalq konfransa dəvət olunub. Rabitə Nazirliyi timsalında Azərbaycan bu ilin aprelində Assosiasiyanın assosiativ üzvü olub.
Bütövlükdə, tədbirdə 120 şirkətin, o cümlədən 15 Amerika şirkətinin iştirakı planlaşdırılır.
Sərginin əsas bölmələri aşağıdakılardır:
- Telekommunikasiya və şəbəkə;
- İT və ofis texnologiyaları;
- Kabel və naqilsiz rabitə;
- Peyk rabitəsi və texnologiyaları;
-Teleradioyayım avadanlığı və texnologiyaları;
- Bank texnologiyaları və xidməti;
- Təhlükəsizlik sistemləri;
- Geniş zolaqlı rabitə və texnologiyalar;
- Proqram təminatı və avtomatlaşdırma sistemləri;
- E-biznes və E-hökumət.
"BakuTel" sərgisi 1995-ci ildən bəri hər il keçirilir. Keçən il sərgidə 100-dən artıq şirkət iştirak edib.
"BakuTel-2006" "ITE Group PLC" beynəlxalq sərgi şirkəti və onun Qafqazdakı eksklüziv tərəfdaşı olan "Iteca Caspian LLC" tərəfindən Azərbaycan Rabitə və İnformasiya Texnologiyaları Nazirliyi ilə birgə təşkil olunub.
Bu il ilk dəfə olaraq sərgi dövlət başçısı İlham Əliyevin himayəsi altında keçiriləcək.
