Azərbaycanın Rabitə və İnformasiya Texnologiyaları Nazirliyi 1998-ci ildə Naxçıvan Muxtar Respublikasında informasiya -kommunikasiya avadanlıqlarının quraşdırılması üzrə Daewoo Telecom ilə imzalanmış müqavilə çərçivəsində yaranmış vəziyyətə dair Koreya ilə danışıqlar aparır. Trend xəbər verir ki, bu barədə bu gün rabitə naziri Əli Abbasov bildirib.
Onun sözlərinə görə, Koreya tərəfi əvvəllər tələb etdiyi 9 mln. ABŞ dolları əvəzinə Azərbaycanın qismən 4,5 mln. ABŞ dolları ödəməsinə razılıq verib.
"Müqavilənin bəzi bəndləri üzrə bir sıra anlaşılmazlıqlar var idi və Rabitə Nazirliyi 2002-ci ildə maliyyələşdirməni dayandırdı. Qəti qərar danışıqlardan sonra qəbul olunacaq", - deyə nazir qeyd edib.
