Bu gün Bakıda "BakuTel-2006" 12-ci beynəlxalq informasiya texnologiyaları sərgisi çərçivəsində "Xüsusi iqtisadi zonalar: Azərbaycanda davamlı iqtisadi inkişafın yeni istiqamətləri" mövzusunda konfrans öz işini yekunlaşdırıb.
Trend in xəbər verdiyi kimi, konfrans - "Kiçik və orta innovasiya sahibkarlığının inkişafında texnoparkların rolu", "Elektrik avadanlıqları və proqram məhsullarının istehsalı və ixracı üzrə regional bazanın yaradılması", "Ölkənin səmərəli tranzit informasiya məkanınına (Data Centre) çevrilməsi", "Formalaşan informasiya cəmiyyəti üçün insan resurslarının hazırlanması və inkişafı" - 4 plenar sessiyadan ibarət olub.
Birinci sessiyanı giriş sözü ilə Beynəlxalq Elmi Parklar Assosiasiyasının (International Association of Science Parks IASP) baş direktoru Luis Sanz açıb. Daha sonra "Cisco Systems" şirkətinin "Internet Business Solution" qrupunun məsləhətçisi Asya Rudkovskayanın, Azərbaycan Rabitə və İnformasiya Texnologiyaları Nazirliyinin məsləhətçisi Diana Landaunun, "Sinam" şirkətinin başçısı Elçin Əliyevin və SPR şirkətinin mütəxəssisi Kreyq Bleyklinin məruzələri dinlənilib.
İkinci iclasda isə elektrik avadanlıqları və proqram məhsullarının istehsalı və ixracı üzrə regional bazarın yaradılması məsələlərinə dair "HP"nin Avropa, Yaxın Şərq və Asiya ölkələri üzrə vitse-prezidenti Rafael Bruqnini, "Alcatel"in MDB üzrə vitse-prezidenti Yoxan Vanderpleyts və başqaları məruzələrlə çıxış ediblər.
Növbəti, "Ölkənin səmərəli tranzit informasiya məkanınına (Data Centre) çevrilməsi" mövzusuna həsr olunan iclas isə WSA (Avstriya) təmsilçisi Piter Brukanın sədrliyi ilə keçib. İclasda "Cisco Systems"in vitse-prezidenti Massimo Miqluolo, informasiya texnologiyaları institutunun direktoru Rasim Əliquliyev, "Q-Tel" şirkətinin vitse-prezidenti Pol Brandenburq və başqaları məruzə ilə çıxış ediblər.
Konfransın sonuncu - "Formalaşan informasiya cəmiyyəti üçün insan resurslarının hazırlanması və inkişafı" sessiyası Taylanddakı Asiya Texniki Universitetinin prezidenti Səid İrandustun sədrliyi ilə keçirilib. İclasda Odessa Milli Rabitə Akademiyasının rektoru, professor Vorobienko P.P. (Ukrayna), Corc Meyson Universitetinin professoru De Beyk (ABŞ) və başqaları məruzə ilə çıxış ediblər.
Bütövlükdə, Azərbaycanda texnoparkların yaradılması məqsədi ilə keçirilmiş sessiyalar zamanı bu sahədə fəaliyyətin ən başlıca prioritetləri qeyd edilib. Bunlar xarici investor şirkətləri üçün əlverişli mühitin yaradılması, adıçəkilən sahədə yüksək ixtisaslı kadrların hazırlanması, hökumət tərəfindən yardım edilməklə dayanıqlı hüquqi bazanın yaradılmasıdır.