"Azərbaycan Rabitə və İnformasiya Texnologiyaları Nazirliyi kimi biz mobil rabitə bazarındakı rəqabəti hərtərəfli dəstəkləyirik". Trend in xəbər verdiyi kimi, bunu bu gün Rabitə Nazirliyinin dövlət idarələri fəaliyyətinin koordinasiyası şöbəsinin müdiri Əflatun Məmmədov bəyan edib.
Onun sözlərinə görə, bazara yeni mobil operatorun gəlməsi bu sahənin genişlənməsinə müsbət təsir edəcək.
"Bu, potensial istifadəçilər üçün yararlı ola biləcək tariflərin aşağı salınmasına və bazara yeni müxtəlif texnologiyaların gətirilməsinə səbəb olacaq", - deyə Ə. Məmmədov bildirib.
Bu baxımdan mütəxəssislər hesab edirlər ki, "Azərfon" BM timsalında yeni operator Azərbaycanda öz fəaliyyətinin dəqiq müəyyən olunmuş strategiyasını həyata keçirməli, ilk növbədə texnoloji yenilikləri və yüksək keyfiyyətli mobil rabitə xidmətlərini tətbiq etməklə bazarın diqqətini cəlb etməlidir.
Hal-hazırda "Azərfon" Azərbaycan ərazisində Bakı, Abşeron yarımadası istiqamətlərində və ölkənin Gəncə, Mincəçevir, Əli Bayramlı, Quba və digər bu kimi bölgələrində şəbəkənin yaradılması üzrə işlər görür. Əhatə zonasına 10 rayon mərkəzi, o cümlədən Bakı-Quba, Bakı-Gəncə magistral yolu da daxil olmalıdır.
Mobil rabitəsi xidməti göstərmək üçün lisenziya Azərfon BM-ə Rabitə Nazirliyinin 2005-ci ilin dekabrın 28-də baş tutan kollegiya iclası zamanı qəbul olunmuş qərara əsasən verilib. Şirkətin təsisçiləri AzTelekom İstehsalat Birliyi (10%), Almaniyanın Siemens (30%) və Britaniyanın iki şirkətidir(60%).
2 il ərzində Azərbaycan ərazisinin 85 %-ni mobil rabitə ilə təmin etmək layihənin başlıca tələbidir. Bu müddət ərzində $300 mln. həcmində investisiya nəzərdə tutulub.
