Azərbaycanın Rabitə və İnformasiya Texnologiyaları Nazirliyi informasiya texnologiyalarına dair nəşrlərin elektron kitabxanasını yaradır. Bu barədə Trend ə nazirlikdən məlumat verilib. Bu istiqamətdə işlər nazirliyin mütəxəssisləri tərəfindən AMEA-nın İnformasiya Texnologiyaları İnstitutu ilə birgə həyata keçirilir.
Hazırda AMEA İTİ mütəxəssisləri bu cür sistemin, onun Azərbaycan dilinə adaptasiya imkanlarını öyrənmək məqsədilə Rusiyadadır.
Elektron kitabxanada həm yerli, həm də xarici müəlliflərin informasiya texnologiyaları mövzusunda indiyədək dərc olunmuş bütün nəşrlərinin yerləşdirilməsi planlaşdırılır. Kitabxananın mərkəzi serveri Rabitə Nazirliyinin bazasında yerləşəcək. Perspektiv planlarda isə bu serverə ali məktəb kitabxanalarının qoşulması da var.
Elektron kitabxananın yaradılması istiqamətində tədbirlər Azərbaycanda rabitə və informasiya texnologiyalarının inkişafı üzrə dövlət proqramına uyğun olaraq həyata keçirilir.
