Azərbaycan Rabitə və İnformasiya Texnologiyaları Nazirliyi Aztelekom istehsalat birliyinin (İB) Gəncə telekommunikasiya qovşağı (TKQ) Gəncədə NGN (Next Generation Network) şəbəkəsinin yaradılması üçün tender elan edib. Bu barədə Trend İB-yə istinadən xəbər verir.
NGN şəbəkəsinin yaradılması üzrə bir lota görə keçirilən tenderlə maraqlananlar sənədlərini 9 yanvar 2007-ci ilə qədər, tender təkliflərini - 17 yanvar 2007-ci ildən gec olmayaraq TKQ-ya təqdim etməlidirlər. Tenderdə iştirakın qiyməti 3 min manat təşkil edir. Prosedurun özü TKQ-da yanvarın 18-i saat 11.00-da keçiriləcək.
Bakıda bu texnologiya ilk dəfə Bakı Telefon Rabitəsi İB-nin (BTRİB) abunəçilərinə Çinin Huawei şirkətindən alınmış avadanlıq hesabına ötən il təqdim edilib.
NGN (növbəti nəsil şəbəkəsi) paketlərin kommutasiyasından istifadə etməklə nitqin, təsvirlərin və məlumatların ötürülməsi üçün nəzərdə tutulmuş universal çoxməqsədli şəbəkədir. NGN şəbəkəsi telekommunikasiya trafikinin müxtəlif növləri üçün zəruri olan xidmət keyfiyyətini təmin edir. Adı çəkilən texnologiyanın tətbiqi abunəçilərə VoIP-telefoniya, səsli poçt, məlumatların ötürülməsi xidməti, multimediya xidmətləri, virtual özəl şəbəkələr, məlumatların vahid şəklə salınmış mübadiləsi, məlumatların ani mübadiləsi, interaktiv nitq cavabı sistemi xidmətləri, interaktiv oyunlar, video-konfranslar və ev meneceri kimi xidmətlərdən istifadə etmək imkanı verəcək.
