Parisin Apellyasiya məhkəməsi Maltanın FIMbank-ının (First International Merchant Bank) əvvəl Azərbaycanın xeyrinə qəbul olunmuş qərara dair şikayətə iddiası üzrə qərarın çıxarılmasına hazırlaşır. Bu barədə Trend ə cümə günü Azərbaycan Rabitə və İnformasiya Texnologiyaları Nazirliyindən məlumat verilib.
FIMbank 2004-cü ilin iyul ayında guya Rabitə Nazirliyinin və Poçtbankın zəmanəti altında Rabitə Nazirliyinin mövcud olmayan müəssisələrinə (Aztell - 3,035 mln. ABŞ dolları və Baktell - 1,56 mln. ABŞ dolları) verilmiş kreditin ödənilməməsi faktı üzrə iddia ilə Azərbaycan hökümətinə qarşı çıxış edib.
Yuxarı instansiyalı Paris məhkəməsi (Tribunal Le Grande Instance de Paris) Rabitə Nazirliyinin Eutelsat S.A.-ya qoyulmuş 6,5 mln. avro həcmində vəsaitlərinə qoyulmuş həbsin ləğv olunması haqqında Azərbaycanın xeyrinə qərar çıxarıb. Məhkəmənin qərarına görə, FIMbank Azərbaycan tərəfinə vurduğu mənəvi ziyana görə 5 min avro və məhkəmə-prosedur məsələlərinə xərclərə görə 900 avro ödəməlidir. FIMbank məhkəmənin qərarı ilə razılaşmayıb və şikayət üçün Apelyasiya məhkəməsinə müraciət edib.
"Biz gözləyirik ki, Apellyasiya məhkəməsi yanvarın sonuna qədər bu məsələyə dair öz qərarını elan edəcək", - deyə nazirlikdən bildirilib.
Əgər Apellyasiya məhkəməsi bankın xeyrinə qərar çıxarsa, Azəbaycan tərəfi qərara şikayət vermək üçün Ali məhkəməyə müraciət etməli olacaq.
Yuxarı instansiyalı Paris məhkəməsinin qərarı oktyabrın 13-də keçirilmiş məhkəmə iclasının yekunu üzrə noyabrın 10-da qəbul olunub.
