Azərbaycan Rabitə və İnformasiya Texnologiyaları Nazirliyinin Azərpoçt Dövlət müəssisəsi və İspaniyanın Amadeus şirkəti aviabiletlərin satışını təşkil etmək üçün müqavilə imzalayıblar. Bu barədə Trend Rabitə Nazirliyinin mətbuat xidmətinə istinadən xəbər verir.
Müqaviləyə əsasən, Lənkəran, Sabirabad, Şəki, Zaqatala, Sumqayıt, Xətai və Səbail rayonlarının poçt filiallarından təxminən 10 nəfər tədris kurslarına göndəriliblər.
Bu əməkdaşların əksər hissəsi şirkətin sertifikatlarını alıblar.
Sumqayıtda, Sabirabadda və Lənkəranda, 1 və 2 saylı poçt filiallarında terminal sistemlərin və lazımi texniki avadanlığın quraşdırılması üzrə işlər görülüb.
AZAL Dövlət konserninin sertifikatlaşdırma və reyestr idarəsi görülmüş tədbirlərə nəzarət edib.
Bəzi səbəblərdən AZAL-ın sertifikatını almaq hələ mümkün deyil. Bu sertifikatın olmaması aviabiletlərin satış həcminin artmasına mənfi təsir göstərir. Yaranmış vəziyyətdən çıxmaq üçün bir neçə aviaşirkətlə subagent səviyyəsində müqavilələr imzalanıb. Bu günə qədər 23 bilet satılıb.
"Yaranmış vəziyyətdə Azərpoçt-un əsas məqsədi AZAL-ın sertifikatını almaq, müəssisənin digər şöbə və filiallarında biletlərin satılmasıdır", - deyə mətbuat xidmətində qeyd olunub.
