Azərbaycan, Bakı/ Trend müxbir S.Babayeva/ Xüsusi işçi qrupu mayın 4-də əhalinin aztəminatlı hissələrinin kompyuterlə təminatına yönəlmiş "Xalq kompyuteri" layihəsinin ilkin variantını müzakirə edəcəklər. Bu barədə cümə aşamı Rabitə və İnformasiya Texnologiyaları Nazirliyindən məlumat verilib.
Sonra sənəd baxılmaq üçün Azərbaycan hökumətinə veriləcək. İşçi qrupu Nazirliyin, Intel və Microsoft şirkətlərinin mütəxəssislərindən ibarətdir.
Layihənin məqsədi kompyuterlərin aztəminatlı təbəqələrə uzunmüddətli və aşağı faizlə kreditə verilməsidir. Maliyyələşdirmə işlərinin isə həm hökumət, həm də digər vəsaitlər hesabına təmin olunması nəzərdə tutulur. Microsoft proqram təminatına lisenziya verir, İntel isə müvafiq avadanlıqları güzəştlə təqdim edir.
Rabitə Nazirliyindən bildiriblər ki, qurumun öz vəsaitləri hesabına Şamaxıda gənclərin kompyuter biliklərinin artırılmasını nəzərdə tutan pilot layihənin həyata keçirilməsi nəzərdə tutulur. Layihənin uğurla həyata keçiriləcəyi təqdirdə digər regionlara da genişlənəcəyi istisna olunmur.
Nazirliyin təqribi hesablamalarına görə, bu gün Azərbaycanda hər 100 nəfərə 3-4 kompyuter düşür. Bu layihənin həyata keçirilməsi ilə müvafiq rəqəmi beş dəfəyə qədər artırmaq mümkün olacaq.
