Azərbaycan, Bakı / " / BMT-nin ərzaq və kənd təsərrüfatı təşkilatı (Food and Agriculture Organization of the United Nations FAO) Azərbaycan Milli Elmlər Akademiyasının informasiya texnologiyaları institutunu (AMEA İTİ) əməkdaşlığa dəvət edib. AMEA-dan verilən məlumata görə, bu məsələ bu yaxınlarda BMT-nin sözügedən təşkilatının ekspert-koordinatoru Stefan Tanikin institutun rəhbərliyi ilə apardığı danışıqların müzakirə predmeti olub.
Tanik İTİ-yə mövcud imkanlardan yararlanmağa və Azərbaycanda fermer təsərrüfatlarının inkişafı üçün müvafiq texniki təminat sisteminin yaradılmasını nəzərdə tutan layihəyə qoşulmağı təklif edib. Eyni zamanda BMT təmsilçisi kompüter şəbəkəsinin və proqram təminatının yaradılması, habelə kadr hazırlığı istiqamətində yardım edə biləcəklərini diqqətə çatdırıb.
İTİ-nin direktoru Rasim Əliquliyev bildirib ki, bu cür əməkdaşlıq rəhbərlik etdiyi struktur üçün faydalıdır.
Qeyd edək ki, Azərbaycan artıq 11 ildir ki, FAO-nun üzvüdür.
