Azərbaycan, Bakı/ Trend müxbir S.Babayeva/ Azərbaycanın Rabitə və İnformasiya Texnologiyaları Nazirliyi milli rabitə peyki AzərSat-ın buraxılışının həyata keçirilməsi layihəsi üzrə hökumətə təkliflər hazırlayaraq təqdim edəcək.
Nazirlikdən bildiriblər ki, hazırda müəssisədə maraqlı şirkətlərin qiymətləndirilməsi aparılır və bu, iyulun sonuna qədər başa çatdırılacaq. Cəmisi altı iri peyk şirkətinin təkliflərinə baxılır. Tarif və xidmətlər baxımından daha münasib olan şirkətlər hökumətə təqdim olunacaq.
"Ola bilər ki, iki şirkət seçilsin, həm hazırlanma, həm də buraxılış üçün", - deyə nazirlikdən bildirilib.
AzərSat layihəsi 80-100 mln. dollar dəyərində qiymətləndirilir.
Onun əhatə dairəsinə isə Avropa və Asiyanın bir hissəsi - Qazaxıstan, Türkmənistan və İran daxildir.
2008-ci ildə Azərbaycan peyk üçün orbitdə yer almağı planlaşdırır. Onun buraxılışı isə bir neçə il sonra mümkündür.
Nazirliyin planlarına bu peykin gücünün bir hissəsini satmaq daxildir. Belə ki, ölkə yalnız bunun 20-25 faizindən istifadə etmək gücündədir.