Azərbaycan, Bakı/ Trend müxbir S.Babayeva/ Birinci yarımildə Azərbaycanın nəqliyyat müəssisələrində muzdlu işçilərin sayı 1224 nəfər artaraq 66981 nəfər təşkil edib. Bu barədə məlumatı Dövlət Statistika Komitəsindən veriblər.
Nəqliyyat sahəsində çalışan işçilərin ümumi sayının 84,5 faizi dövlət müəssisələrinin, 15,5 faizi isə özəl sektorun payına düşüb. İşçilərin 64 faizi avtomobil yolları nəqliyyatı, 13,6 faizi su, 5,3 faizi hava nəqliyyatında, 17,1 faizi isə yardımçı müəssisələrdə işləyirlər. Orta aylıq əmək haqqı isə 37,3 faiz artaraq 210,1 manat təşkil edib. Bu göstərici hava nəqliyyatında 486,9 manat, dənizdə - 357,1 manat, dəmir yol nəqliyyatında isə 127,1 manat təşkil edir.
Azərbaycanda rabitə sahəsində çalışanların sayı da 6,1 faiz artaraq 21598 nəfər olub. Hər bir işçinin orta aylıq əmək haqqı isə 39,3 faiz artaraq 295,8 manat təşkil edib. Özəl rabitə müəssisələrində çalışanların sayı dövlət rabitə müəssisələrində çalışanlarla müqayisədə 5,2 dəfə çoxdur.
