...

Ramil Qasımov: Prezident İlham Əliyevin növbəti 7 il ərzində xalqın dəstəyi ilə fəaliyyətini davam etdirəcəyinə şübhə yoxdur

Nəzər nöqtəsi Materials 23 Mart 2018 09:55 (UTC +04:00)
Prezident İlham Əliyevin növbəti 7 il ərzində xalqın dəstəyi ilə fəaliyyətini davam etdirəcəyinə şübhə yoxdur.
Ramil Qasımov: Prezident İlham Əliyevin növbəti 7 il ərzində xalqın dəstəyi ilə fəaliyyətini davam etdirəcəyinə şübhə yoxdur

Bakı. Vüqar İmanov - Trend:

Prezident İlham Əliyevin növbəti 7 il ərzində xalqın dəstəyi ilə fəaliyyətini davam etdirəcəyinə şübhə yoxdur.

Bunu Trend-ə Azərbaycan Televiziyası Mədəniyyət kanalının direktoru Ramil Qasımov deyib.

R.Qasımov bildirib ki, müstəqil Azərbaycanda ictimai həyatın bütün sahələrində, o cümlədən mədəniyyət və incəsənət sahəsində dövlətin qayğısı və diqqəti nəticəsində böyük inkişaf prosesləri gedir: "Mədəniyyət və incəsənətimiz dünyanın müxtəlif ölkələrində təbliğ olunur və çox sevindirici haldır ki, bütün bu işlərin həyata keçirilməsində ən böyük yük məhz Azərbaycan gənclərinin payına düşür. Əsası ümummilli lider Heydər Əliyev tərəfindən qoyulmuş, gənclərə qayğı və diqqəti əks etdirən gənclər siyasəti bu gün də uğurla davam etdirilir. Dövlətimizin və ölkə rəhbərliyinin gənclər üçün müəyyən etdiyi fərdi təqaüdlər, onların xaricdə təhsil alması üçün yaradılmış imkanlar, eyni zamanda Heydər Əliyev Fondunun gənclər üçün həyata keçirdiyi irimiqyaslı layihələr onların məsuliyyətini daha da artırır. Hər bir gənc kimi, mədəniyyət sahəsində çalışan gənclər olaraq daima bu qayğını öz üzərimizdə hiss edir və göstərilən etimadı doğrultmağa çalışırıq.

İlk növbədə onu qeyd etməliyəm ki, Azərbaycanın dinamik inkişafı ölkəmizin beynəlxalq imicinin yüksəlişinə təkan verən amillərdən biridir. Son illər ərzində həyata keçirilən dövlət proqramlarında reginonların tarazlı inkişafı və onlar arasındakı sosial, iqtisadi, mədəni fərqlərin aradan qaldırılması, əhalinin daimi iş yerləri ilə təmin edilməsi, abadlaşdırma və quruculuq işlərinin aparılması, infrastrukturun yaradılması və yenidən qurulması kimi vacib məsələlər reallaşdırılıb".

O vurğulayıb ki, dövlətimiz tərəfindən həm beynəlxalq, həm də yerli səviyyədə həyata keçirilən uğurlu mədəniyyət siyasətinin və reallaşdırılan mədəni layihələrin nəticələri göz qabağındadır: "Bu tədbirlərin miqyası və hədəf auditdoriyasının rəngarəngliyini nəzərə alsaq, bir neçə istiqaməti müəyyənləşdirmək mümkündür. Bu istiqamətlərdən biri, heç şübhəsiz ki, Azərbaycan həqiqətlərinin yayılmasına, dövlətimizin beynəlxalq imicinin artmasına xidmət edən ölkəmizdə keçirilmiş nüfuzlu beynəlxalq tədbirlərdir. Buraya humanitar, mədəniyyət və digər sahələrdə keçirilən tədbirləri aid etmək olar. İllərdir ənənə halını almış Qəbələdə keçirilən Beynəlxalq Musiqi Festivalı, Şəkidə keçirilən “İpək Yolu” Beynəlxalq Musiqi Festivalı, Beynəlxalq Muğam müsabiqəsi, Masallıda keçirilən Beynəlxalq Folklor Festivalı, Azərbaycanın 2011-ci ildə isə "Eurovision" mahnı müsabiqəsindəki qələbəsi musiqi mədəniyyətimizin daha da inkişafına, Bakıda keçirilən "Eurovision-2012" müsabiqəsi isə bu mədəniyyətin təbliğinə şərait yaradıb. Bu hadisələrin birbaşa canlı yayımla dünyaya və Azərbaycana yayımlanmasında Mədəniyyət kanalı xüsusi rol oynayıb. Mədəniyyət siyasətinin reallaşdırılmasında növbəti bir istiqamət muğam (2008-ci ildə), aşıq sənəti (2009-cu ildə), Novruz bayramı ənənələri (2009-cu ildə), xalçaçılıq sənəti (2010-cu ildə), tar ifaçılıq sənəti (2012-ci ildə), çövkan oyunu (2013-cü ildə), kəlağayı hazırlanması sənəti (2014-cü ildə), Lahıcda misgərlik sənəti (2015-ci ildə), kamança ifaçılıq sənəti (2017-ci ildə) kimi Azərbaycan xalqının mədəniyyət və incəsənət nümunələrinin YUNESKO-nun qeyri-maddi irs siyahısına daxil edilməsini vurğulamaq istərdim".

R.Qasımov deyib ki, mədəniyyət siyasətinin reallaşdırılmasında digər bir istiqamət kimi ümummilli lider Heydər Əliyev tərəfindən əsası qoyulan dövlət gənclər siyasətinin əsas istiqamətlərindən biri olan mədəniyyət və incəsənət sahəsində xüsusi istedada malik gənclərin aşkara çıxarılması və yetişdirilməsi, onların dövlət qayğısı və dəstəyi ilə əhatə olunması götürmək olar:

"Sağlam, müasir düşüncə tərzinə malik, yeniliklərə açıq olan, novatorçu və mütərəqqi gəncliyin yetişdirilməsi, xalqımızın sağlam gələcəyinin təmin edilməsi kimi güclü mənəvi prinsiplər bu siyasətin əsas sütunlarıdır. “Gənc istedadlar üçün xüsusi təqaüdlərin təsis edilməsi haqqında”, “Azərbaycanın gənc istedadlarına dövlət qayğısı haqqında”, “Dövlət gənclər siyasəti haqqında” qanun, “İstedadlı yeniyetmələrin və yaradıcı gənclərin sosial, iqtisadi və s. problemlərinin həllinə yönəlmiş, onların öz qabiliyyətlərini inkişaf etdirməsinə kömək edən Dövlət Proqramı” və bir sıra digər normativ-hüquqi aktlar bu sahənin qanunvericilk bazasının formalaşmasında mühüm rol oynayıb. Heç şübhəsiz ki, mənim də gənc bir ifaçı kimi formalaşmağım bu siyasətin reallaşdırılması çərçivəsində baş verib və bunun məntiqi nəticəsi olaraq dövlətimiz tərəfindən "Əməkdar artist" fəxri adı ilə təltif olunmuşam. Mədəniyyət və incəsəntin digər sahələrində də istedadlı gənclərə fəxri adların verilməsi, onların Prezident təqaüdü və mükafatına layiq görülməsi, adlarının Azərbaycanın gənc istedadlarının "Qızıl kitabı”na yazılması bu sahəyə dövlətin nə qədər həssaslıqla yanaşmasının sübutudur. Hazırda Azərbaycan Televiziyasının Mədəniyyət kanalının kollektivi olaraq biz də daima hazırladığımız proqramlar və verilişlər vasitəsilə mədəniyyət və incəsənət hadisələrinin işıqlandırılması,dövlət tərəfindən xüsusi qayğı ilə əhatə olunmuş istedadlı gənclərin üzə çıxarılması və təbliği, bütövlükdə isə, Azərbaycan həqiqətlərinin geniş dünya ictimaiyyətinə çatıdırılması işinə əlimizdən gələn töhfələr veməyi əsirgəmirik".

Onun sözlərinə görə, təbii ki, bütün bu sadalanan faktlar praktiki siyasətin nəticələridir və ölkə rəhbərliyi, dövlətimiz bu addımların reallaşdırılmasını planlı surətdə həyata keçirir: "Azərbaycan mədəniyyət və incəsənət xadimlərinin milli musiqimizi dünyanın inkişaf etmiş ölkələrində təbliğ etməsinin məntiqi davamı olaraq, ölkəmizi ziyarət edən dünyanın tanınmış mədəniyyət və incəsənət xadimləri mədəni irsimizin zənginliyini xüsusi vurğulayır və bu irsin ecazkarlığını böyük heyrətlə seyr edirlər. Böyük əminliklə söyləyə bilərəm ki, mədəniyyət və incəsənət xadimləri, müsiqiçilər gələcək fəaliyyətlərində də xalqına xidmət edərək yeni-yeni layihələrə imza atacaq, dövlətimizin adını ucaldacaq.

Sonda onu vurğulamaq istərdim ki, çoxşaxəli və mütərəqqi ictimai-siyasi cizgilərə sahib olan, uzun illərdir dövlətçilik sükanının başında əzmkarlıq və dəyanətlə dayanmış, vətənini və xalqını öz canından çox sevdiyini dəfələrlə vurğulamış və bunun inkaredilməz həqiqət olduğunu öz yorulmaz fəaliyyəti, xalqına xidməti ilə sübut etmiş cənab İlham Əliyevin növbəti 7 il ərzində xalqın dəstəyi ilə bu fəaliyyətini davam etdirəcəyinə şübhəm yoxdur. Cənab Prezidentin də söylədiyi kimi, biz gənclərin də vəzifəsi dövlətin inkişafı və xalqın rifahının yüksəldilməsi kimi müqəddəs vəzifələrin yerinə yetirilməsində yorulmadan fəaliyyət göstərmək, bu işdə prezidentin ətrafında sıx birləşməkdir. Heç şübhəsiz ki, xalqımız növbəti prezdient seçkilərində, seçiminin nə dərəcədə düzgün olduğunu təsdiq edəcək".

Məqalədə:
Xəbər lenti

Xəbər lenti