Bakı. Əli Qasımov - Trend:
Avropa Şurası Parlament Assambleyasının (AŞ PA) korrupsiya ilə bağlı hesabatında Azərbaycana qarşı açıq-aşkar qərəz müşahidə olunurdu, bu isə qəbuledilməzdir.
Trend-in məlumatına görə, bunu Türkiyənin AŞ PA-dakı nümayəndə heyətinin üzvü Yasin Aktay deyib.
Deputat AŞ PA tərəfindən PYD-nin keçmiş həmsədri Saleh Müslümün dəvət olunmasını xatırladıb:
“Əgər korrupsiyadan danışırıqsa, o zaman 29 nəfərin həlak olduğu terror aktının təşkilində şübhəli bilinən terror təşkilatının üzvlərinin hansı qeyri-etik yollarla AŞ PA-da çıxış etmək imkanı qazanmasından başlaya bilərik”.
O bildirib ki, hesabatda AŞ PA-nın yalnız bir üzvünə aid edilən məqamlara diqqət ayrılır: “Bu da elə təəssürat yaradır ki, təşkilatın məqsədi konkret ölkəni qaralamaqdır. Ümumilikdə, hesabatı qiymətləndirərkən elə təəssürat yaranır ki, bu sənəd Azərbaycanla Avropa Şurası arasındakı münasibətlərdə problemlərin yaradılması üçün hazırlanıb”.