Bakı. Mətanət Nəsibova - Trend:
Azərbaycan Prezidenti İlham Əliyev Qırğızıstan və Azərbaycanın siyasi və iqtisadi sahələrdə əməkdaşlığına böyük əhəmiyyət verərək türkdilli dövlətlərin gələcək münasibətlərinə yeni təkan verdi.
Bunu Trend-ə Qazaxıstan Müdafiə və Aerokosmik Sənaye Nazirliyinin Hərbi-Strateji Araşdırmalar Mərkəzinin layihələrinin rəhbəri, professor, siyasət elmləri namizədi, "Sərdar" elmi jurnalının baş redaktoru xanım Karlıqaş Nuqmanova Azərbaycan Prezidenti İlham Əliyev və Qırğızıstan Prezidenti Sooronbay Jeenbekovun Çolpon-Ata şəhərindəki görüşünü şərh edərkən deyib.
Onun sözlərinə görə, Qırğızıstan Prezidenti açıq və məzmunlu söhbətə hazır olduğunu ifadə edib və bildirib ki, Azərbaycan dövlət başçısının Qırğızıstana növbəti rəsmi səfəri iki ölkə arasında əməkdaşlığın möhkəmlənməsi üçün vacib addım olacaq.
Ekspert bildirib ki, Qırğızıstan üçün Çolpon-Atada keçirilmiş Türkdilli Dövlətlərin Əməkdaşlıq Şurasının VI Zirvə görüşü tarixi hadisə idi, çünki sammitdə Qazaxıstan Prezidenti Nursultan Nazarbayev, Azərbaycan Prezidenti İlham Əliyev, Türkiyə Prezidenti Rəcəb Tayyib Ərdoğan, Türkmənistan Prezidenti Qurbanqulu Berdiməhəmmədov, Özbəkistan Prezidendi Şavkat Mirziyoyev iştirak ediblər, Macarıstanın baş naziri Viktor Orban isə sammitə fəxri qonaq kimi qatılıb:
"Bu gün dünya dəyişib. 21-ci əsrdə inkişaf mərkəzi dünya əhalisinin 2/3 hissəsinin yaşadığı və nəhəng ehtiyatların yerləşdiyi Asiyaya yönəlib. Asiyanın inkişaf etməkdə olan iqtisadiyyatlarının güclü sıçrayışı qlobal proseslərdə yeni reallığı əks etdiib. Ona görə də bu tarixi hadisədən türkdilli dövlətlərin münasibətlərinə, xüsusilə də Qırğızıstan, Qazaxıstan, Azərbaycan və Türkiyə arasında münasibətlərə yeni təkan verməsi üçün istifadə etmək lazımdır".
K.Nuqmanovanın fikrincə, aktual məsələ odur ki, Çolpon-Atadakı sammit "Bir zolaq - bir yol" irimiqyaslı strateji layihəsinin beşillik yubileyi ərəfəsində keçirildi:
"Qloballaşmanın şərq modelinə çevrilmiş bu təşəbbüs artıq 200-dən çox ölkəni, 4.4 milyard sakini və ya dünya əhalisinin 53 faizini birləşdirir. Mən bu faktı ona görə vurğulayıram ki, Qazaxıstan Çinin yaxın qonşusudur və "Bir zolaq - bir yol" marşrutunda yerləşən ilk ölkədir. Fikrimcə, Mərkəzi Asiyanın iqtisadi və siyasi inkişafında vacib rolu şərq, cənub və cənub-qərb qonşuları oynayacaq. Yaxın 10 il ərzində Mərkəzi Asiyanın gələcəyini artıq indidən görünməyə başlayan tendesniyalar müəyyən edəcək".
Ekspert vahid türk dünyasının üzv ölkələri arasında əlaqələrin dərinləşməsinin vacibliyini qeyd edib:
"Bugünkü geosiyasi vəziyyət fonunda Şura təkcə ölkələr arasındakı mədəni, elmi və humanitar əməkdaşlıq məsələlərini müzakirə etməməli, həm də diqqəti beynəlxalq kibertəhlükəsizlik, terror təhlükəsi ilə mübarizə, yüksək texnologiyalar sahəsində əməkdaşlıq məsələlərinə yönəltməlidir".