Federasiya Şurası (FŞ) palatanın RF prezidentinə Cənubi Osetiya və Abxaziyanın müstəqilliyinin tanınmasına dair müraciətini yekdilliklə dəstəkləyib. Bu barədə "Vesti" telekanalı xəbər verib.
FŞ-nin növbədənkənar iclasında çıxış edən Rusiya parlamenti Ali Palatasının spikeri Sergey Mironov qeyd edib ki, Cənubi Osetiya və Abxaziyanın "müstəqilliklərinin tanınması üçün hər bir əsas var".
RF Federasiya Şurasının bugünkü gündəliyinə Cənubi Osetiya və Abxaziyanın müstəqilliklərinin tanınmasına dair RF prezidentinə müraciət daxildir. Gündəliyə belə bir müraciətin daxil edilməsinə dair qərarı plenar iclas öncəsi toplaşan Palata Şurası qəbul edib. Sənəd layihəsi Federasiya Şurasının Konstitusiya Qanunvericiliyi Komitəsi tərəfindən təqdim edilib.
İclasda tanınmamış respublikaların prezidentləri Eduard Kokoytı və Sergey Baqapş çıxış edib.
Cənubi Osetiya prezidenti Kokoytının sözlərinə görə, Cənubi Osetiya və Abxaziya xalqları daha çox tanınma hüququna malikdirlər, nəinki Kosovo: "Biz müstəqilliyimizin tanınması üçün Kosovodan daha çox siyasi-hüquqi əsaslara malikik. Mən "biz" dedikdə, həm Cənubi Osetiya, həm də Abxaziyanı nəzərdə tuturam", - deyə Kokoytı Federasiya Şurasında bildirib.