Azərbaycan, Bakı, 03 sentyabr/ Trend , müxbir D.İbrahimova, T.Cəfərov/ Rusiya İrana dair BMT Qətnaməsinin qəbulunda maraqlı olsa da, RF- nin bu məsələ üzrə qəti mövqeyi hələ də aydın deyil.
" Rusiya İranın nüvə proqramının realizəsini dayandırmaq istəyir, lakin bu ölkənin qarşıya qoyulan hədəfə çatması üçün müəyyən strategiyası yoxdur ki, bu da Sergey Lavrov və Vladimir Putinin bir-birinə zidd bəyanatlarında öz əksini tapır", - amerikalı ekspert Endrü Qrotto (Andrew Grotto) Trend -a bildirib.
Sentyabrda BMT-nin daimi üzvləri İranın nüvə proqramına dair yeni Qətnaməni müzakirə edəcəklər. Rusiyanın rəsmi nümayəndələri iki həftə ərzində RF-nin bu Qətnaməyə münasibəti ilə bağlı zidd bəyanatlar veriblər.
Rusiyanın Baş naziri Vladimir Putin CNN - ə müsahibəsində bəyan edib ki, İranın nüvə proqramı ilə qarşıdurmada Qərb və Rusiyanın maraqları üst-üstə düşür. Rusiya XİN rəhbəri Sergey Lavrov isə, Amerikanın Gürcüstanla münasibətlərini pisləyərək, bildirib ki, Rusiya BMT-nin İrana dair Qətnaməsini dəstəkləməyəcək.
Qrottonun rəyinə görə, Rusiya əvvəlki üç Qətnaməni dəstəklədiyi kimi, BMT-nin İrana qarşı dördüncü Qətnaməsini də dəstəkləyəcək. Lakin əlavə sanksiyalar o qədər də miqyaslı və səmərəli olmayacaq.
"Bu qətnamə BMT Təhlükəsizlik Şurası üzvlərinin (5+1) İranın nüvə potensialının genişləndirilməsinin qarşısını almağa səy göstərən vahid birlik olduğunu İİR-ə xatırlatmaq üçün qəbul ediləcək", - ABŞ -ın İnkişaf Mərkəzinin Milli Təhlükəsizlik Məsələləri üzrə analitiki Qrotto Trend -a bildirib.
Rusiyanın İrana dair dördüncü Qətnamənin qəbulu ilə bağlı ABŞ, Fransa, Böyük Britaniya, Almaniya və Çinlə əməkdaşlıq edib-etməyəcəyini yalnız Vladimir Putin bilir. Rusiyalı ekspert Vladimir Yevseyevin rəyinə görə, Putinin ABŞ ilə əməkdaşlığa hazır olmaq barədə bəyanatı İrana dair BMT Qətnaməsinin qəbulunu nəzərdə tutmur.
"Sanksiyanın qəbulu üç amildən - İsraildə kimin Baş nazir seçiləcəyi, ABŞ - da seçkilərdə kimin qələbə qazanacağı və Qətnamənin müzakirəsində Amerika-Rusiya münasibətlərindən asılı olacaq", - Rusiya Elmlər Akademiyasının Dünya İqtisadiyyatı və Beynəlxalq Münasibətlər İnstitutunun Beynəlxalq Təhlükəsizlik Mərkəzinin baş elmi əməkdaşı Vladimir Yevseyev Moskvadan telefonla Trend -a bildirib.
Onun rəyinə görə, bu Qətnamənin qəbuluna nə imkan, nə də zərurət var;iqtisadi sanksiyaları nəzərdə tutan 1803 saylı Qətnamə hələ realizə edilməyib.
Beynəlxalq əlaqələr üzrə iranlı ekspert Həsən Şəriətmədari (Gasan Shariatmadari) hesab edir ki, Rusiya İranın nüvə proqramı üzrə əsas mövqeyini gizlətmək istəyir.
"Rusiya BMT-nin İrana qarşı dördüncü Qətnaməsinin müzakirəsinədək Amerika siyasətçiləri arasında ziddiyyətli vəziyyət yaratmağa çalışır", - Şəriətmədari Almaniyadan telefonla Trend -a bildirib.
Onun rəyinə görə, bu məqsədlə Rusiyanın yüksəkvəzifəli məmurlarından biri RF-nin Vaşinqtonla sıx əməkdaşlığa hazır olmasından, digəri isə, Qətnaməni dəstəkləmək istəmədiyindən danışır.
ABŞ üçün Gürcüstan, Rusiya üçün İranın nüvə problemi manipulyasiya vasitələridir,- Şəriətmədari güman edir. "Rusiya və ABŞ yaxın gələcəkdə Qafqazdakı təsir dairələrini bölüşə bilməyəcəklər", - ekspert əlavə edib.
Onun rəyinə görə, Rusiya və ABŞ -ın ayrı-ayrı problemlər üzrə (BMT-nin İrana qarşı sanksiyaları və ya qoşunların Gürcüstan ərazisindən çıxarılması) konsensusa gəlsələr də, yaxın gələcəkdə MDB regionları və Yaxın Şərqə dair ümumi razılıq əldə edilməyəcək.
Yevseyevin rəyinə görə, indi Rusiya üçün birinci dərəcəli vəzifə Cənubi Osetiyada vəziyyətin sabitləşdirilməsidir.
"NATO gəmiləri Gürcüstanda olarkən, Avropa İttifaqı Rusiyanın özünə qarşı sanksiyalar tətbiq etmək istədiyi vaxt RF-nin Qətnaməni dəstəkləyəcəyini təsəvvür etmək çətindir", - Yevseyev bildirib.
Müəlliflə əlaqə saxlamaq üçün elektron ünvan - [email protected]
