Əfqanıstan, Kabil, 10 noyabr / Trend müxbir A.Həkimi/ Əfqanıstan parlamenti nümayəndələri ABŞ-ın yeni hökumətindən bu ölkədə azad və şəffaf seçkilərin keçirilməsini ciddi şəkildə dəstəkləməsini gözləyirlər. Onlar digər ölkələrin seçkilərə müdaxiləsindən narahatlıqlarını bildiriblər.
Parlament nümayəndələri ümid edirlər ki, ABŞ-ın yeni seçilmiş prezidenti Barak Obama öz təbliğat-təşviqat kampaniyasında söz verdiyi kimi, Əfqanıstanda ciddi dəyişikliklər edəcək. Obama seçkiqabağı çıxışlarında Pakistanda yerləşən Taliban qrupunun əsas mövqelərinə hücum edəcəyini bildirmişdi.
Əfqanıstan parlamentinin nümayəndəsi Əhməd Behzad Trend -a müsahibəsində 2005-ci ildə Əfqanıstanda keçirilən prezident seçkilərinə digər ölkələrin müdaxiləsini tənqid edərək, gələn il keçiriləcək prezident seçkilərinin şəffaf keçiriləcəyinə ümid bəslədiyini bildirib.
"Əfqanıstan xalqı ötən prezident seçkisində xarici ölkələrin seçkilərdə vahid şəxsi dəstəkləməsinin şahidi olub", - deyə Behzad bildirib.
O bildirib ki, Amerikanın yeni hökuməti Əfqanıstan hökumətinin işindən razı deyil və bu hökuməti dəstəkləməyəcək. Behzadın sözlərinə görə, Obamanın Amerikada edəcəyi dəyişikliklərdən Əfqanıstan xalqı məhrum qalmamalıdır.
Əfqanıstan rəsmiləri terrorizmə qarşı mübarizənin Pakistanda davam etdirilməsi ilə Əfqanıstanda sabitliyin yaranacağına ümid edirlər. Onların fikrincə, ABŞ-ın yeni hökuməti və beynəlxlaq ictimaiyyət xalqın səsinə hörmətlə yanaşmalı və prezident seçkilərində hər cür müdaxiləyə qarşı çıxış etməlidirlər. Xalq azad seçkilər keçirməli və taleyini özü həll etməlidir.
"Əfqanıstan xalqı özü qərar qəbul etməli və digər ölkələrin seçkilərin nəticəsinə müdaxilə etməsinə icazə verməməlidir", - deyə parlamentin digər nümayəndəsi Səbrina Saqib bazar ertəsi Trend -a müsahibəsində bildirib.
Saqib ABŞ hökumətinin Əfqanıstan xalqının istəyini dəstəkləməsini arzulayıb.
"Əfqanıstandakı qeyri-sabitlik, işsizliyin tüğyan etməsi, adam oğurluğu, silahlı basqınların artması, ərzaq qıtlığı, hökumət strukturlarında rüşvətxorluğun artması əhalini hökumətdən narazı salır", - deyə Saqib bildirib.
"Amerikanın hazırkı hökuməti Əfqanıstanda ölkəni idarə etmək iqtidarında olmayan şəxsləri dəstəkləyir, belə dəstəklər Əfqanıstanı inkişaf yolundan saxlayır", - deyə parlamentin digər nümayəndəsi Məhəmməd Davud Sultan Trend -a bildirib.
Əfqanıstan parlamentinin nümayəndələri Amerikanın yeni hökumətinin siyasətində əsaslı dəyişikliklər olacağına ümid edirlər. Onların fikrincə, Obama Əfqanıstanda təhlükəsizliyin təmin edilməsi üçün bütün lazımi tədbirləri görəcək.
Amerika hərbçiləri indiyədək Taliban qrupunun Pakistandakı mövqeylərinə dəfələrlə hücum edib.
Əfqanıstanda əhali düşünür ki, Pakistan ərazisində terrorizm qarşı mübarizənin gücləndirilməsi ölkədə təhlükəsizli təmin edəcək. Lakin bu, hələ ki müşahidə edilmir.
Taliban qrupu Əfqanıstanın bəzi regionlarında əhalini seçkilərdə iştirak etməməyə çağırıb. Digər tərəfdən, əhalinin əksəriyyəti səsvermə kartlarını almaqdan çəkinir. Onlar bildirirlər ki, növbəti prezident seçkilərində də digər ölkələrin müdaxiləsi olacaq və onlar istəsələr də, istəməsələr də öz istəkləri ilə prezident seçə bilməyəcəklər.
Müəlliflə əlaqə saxlamaq üçün elektron ünvan [email protected]
