...

İrakli Alasaniya Gürcüstan prezidenti vəzifəsinə güclü namizəddir – ekspertlər

Dünya xəbərləri Materials 10 Dekabr 2008 15:59 (UTC +04:00)

Azərbaycan, Bakı, 10 dekabr/ Trend ,  müxbir E.Tariverdiyeva/ İrakli Alasaniyanın Gürcüstanın BMT-dəki nümayəndəsi vəzifəsindən istefa verməsi növbədənkənar seçkilər keçirildiyi təqdirdə onun gələcək prezidentliyinə doğru ilk addım ola bilər, - ekspertlər hesab edirlər.

"Alasaniya prezident vəzifəsinə güclü namizəd kimi görünür və müharibədən sonra gürcü xalqını birləşdirmək üçün kifayət qədər təcrübəsi var", - Qafqaz üzrə britaniyalı ekspert, TransAtlantik İnsitutunun (London) direktoru Ziba Norman (Ziba Norman) hesab edir.

Müxalifətin iki siyasi təşkilatı - "Yeni Sağlar" və Gürcüstan Respublika Partiyası ölkədə növbədənkənar prezident və parlament seçkilərinin təyin edilməsinə nail olmaq məqsədilə alyans formalaşdırıblar. Yeni siyasi birliyə Gürcüstanın BMT-dəki keçmiş daimi nümayəndəsi İrakli Alasaniya rəhbərlik edə bilər, - RİA "Novosti" xəbər verir.

"Bu gün biz alyansın yaradılması haqqında sənəd imzalayırıq. Alyansın məqsədi 2009-cu ilin yazında növbədənkənar parlament və prezident seçkilərinin keçirilməsi və ölkənin siyasi və iqtisadi böhrandan çıxarılmasıdır", - "Yeni Sağlar" partiyasının lideri David Qamkrelidze dekabrın 8 - də keçirilmiş brifinqdə bildirib.

İrakli Alasaniya dövlət təhlükəsizliyi, müdafiə, xarici işlər nazirliklərində işləyib. Gürcüstanın ABŞ, Kanada və Meksikadakı səfirliklərində ikinci katib olub, sürgündə olan Abxaziya hökumətinə başçılıq edib və Gürcüstan - Abxaziya danışıqlarında gürcü dövlət başçısının şəxsi nümayəndəsi olub. 2006 - cı ilin iyulunda Gürcüstanın BMT-dəki daimi nümayəndəsi vəzifəsinə təyin edilib.

Alasaniyanın Gürcüstanın BMT-dəki səfiri vəzifəsindən istefa verməsi xəbəri Gürcüstan KİV-də dekabrın 5-də yayılıb.

Alasaniya istefa verməsinin səbəbini dəqiqləşdirməyib. Lakin Gürcüstan KİV-də artıq bir neçə aydır ki, BMT- dəki səfirin 2008-ci ilin avqust hadisələri zamanı ölkə rəhbərliyinin qərarlarından narazı olması barədə məlumat yayılır, - RİA "Novosti" xəbər verir.

Avqustun 8-nə keçən gecə tanınmamış Cənubi Osetiya respublikasında irimiqyaslı hərbi əməliyyatlar başlayıb. Gürcü qoşunları Tsxinvaliyə daxil olub. Sonradan rus qoşunları Tsxinvalini tutub və gürcü hərbçilərini Gürcüstan ərazisinə sıxışdırıblar. Rusiya avqustun 26-da Abxaziya və Cənubi Osetiyanın müstəqilliyini tanıyıb, sentyabrın 9-da onlarla diplomatik münasibətlər qurulub.

Dekabrın ortalarında Alasaniyanın 35 yaşı tamam olacaq və bundan sonra qanun ona dövlətin ali vəzifəsinə iddia etməyə imkan verəcək.

Alasaniya müxalifətin yeni alyansının lideri qismində maraqlı seçim olacaq, - Norman hesab edir. Diplomatik təcrübəsi və Abxaziyanın separatçı hökuməti ilə əlaqələri onu unikal edir", - TransAtlantik İnstitutun direktoru elektron poçtla Trend ­-a bildirib.

Normanın sözlərinə görə, bəziləri hesab edirlər ki, Alasaniya Saakaşvilinin yerində olsaydı, Osetiyadakı avqust hadisələrindən qaçmaq olardı.

Gürcüstanın müstəqil politoloqu Ramaz Tsiskarişvili də Alasaniyanın Gürcüstanın ali dövlət vəzifəsini tutmaq şanslarını real hesab edir.

"Namizəd bu və ya digər partiya liderlərinin günahları və səhvləri ilə ləkələnməyibsə, onun daha  çox şansı var və bu baxımdan Alasaniya istisna olmayacaq", - Tsiskarişvili Trend -a bildirib.

Gürcüstanın siyasətində siyasi partiyaların lliderləri məsələsi kifayət qədər kəskindir və öz partiyasının adından prezident vəzifəsinə iddia etməyən siyasətçi, adətən, seçicilərin böyük dəstəyini qazanır, - politoloq hesab edir.

Müşahidəçilər Alasaniyanın Saakaşvilinin onun işdən azad edilməsinə dair bəyanatından bir gün əvvəl istefa verə bilməsini və beləliklə də, müxalifətdə lider mövqeyini tutmaq imkanı əldə etməsini keçmiş daimi nümayəndə üçün kozır hesab edirlər. "İnsan nümayişkəranə şəkildə istefaya gedirsə, bu onun müxalif reytinqini artırır. Onu istefaya göndərirlərsə və o, müxalifətə keçirsə, bu inciklik və hakimiyyətin fəaliyyətindən narazılıq kimi görünür", -  MDB Ölkələri İnstitutunun Qafqaz Sektorunun rəhbəri Mixail Aleksandrov Trend -a bildirib.

Müşahidəçilərin çoxu əmindir ki, artıq yazda Gürcüstanda növbədənkənar prezident seçkiləri elan ediləcək.

Aleksandrovun sözlərinə görə, növbədənkənar seçkilər gələn ilin martında baş tuta bilər.

Gürcüstan bu ilin yayında ölkəyə vurulmuş yaraları sağaltmağa çalışır və siyasi dəyişikliklər qaçılmaz olaraq bu prosesin bir hissəsidir, - Norman hesab edir.

"Yalnız müxalifət deyil, ictimaiyyətin böyük bir hissəsi də ölkə rəhbərliyinin mövcud problemlərin həlli üçün potensiala malik olmadığına əmin olur, - Tsiskarişvili deyib. - Növbədənkənar prezident seçkiləri arzu olunan nail olmaq üçün konstitusyon proseslərin idarə edilməsində ictimaiyyətin nə qədər tələbkar olacağından asılıdır".

Materialın hazırlanmasında R.Ağayev (Moskva), N. Kirtsxaliya (Tbilisi), Y.Ostapenko (Bakı) iştirak ediblər.

Müəlliflə əlaqə saxlamaq üçün elektron ünvan:  [email protected]

Xəbər lenti

Xəbər lenti