Fransa, Strasburq, 4 aprel / Trend , müxbir. A. Məhərrəmli/
NATO-Rusiya tərəfdaşlığı Avro-atlantika regionunda təhlükəsizliyin gücləndirilməsini nəzərdə tutan strateji bir element kimi nəzərdə tutulub və biz buna bağlı qalacağıq. Bu barədə Strasburqda keçirilmiş NATO sammitinin yekun Bəyyanaməsində deyilir.
Bəyannamədə qeyd olunur ki, bu əməkdaşlıq ümumi təhlükəsizlik təhdidlərinə qarşı birlikdə və təsirli şəkildə cavab vermək üçün Rusiya ilə NATO arasında dialoq çox əhəmiyyətlidir.
"Bizim Rusiya ilə münasibətlərimiz son NATO sammitindən sonra bir sıra dərin narazılıqlarla müşayiət olunub. Alyans bundan sonra da Rusiya ilə münasibətlərdə ortaya çıxacaq irəliləyişləri dəyərləndirəcək", NATO sammitinin yekun Bəyannaməsində qeyd olunur.
Sənəddə habelə Rusiya təkidlə 12 avqust və 8 sentyabr 2008-ci il tarixlərində üzərinə götürduyü öhdəlikləri yerinə yetirməyə dəvət edilir və onun üzərinə öhdəlik olaraq götürdüyü ərazilərdən çəkilməsi mühüm hesab olunur. Bundan əlavə, sənəddə Rusiyanın sepatatçı rejimlərin müstəqilliyinin tanınması pislənilmək və ondan bunu ləğv etmək tələb olunmaqla yanaşı, bu tanımanın NATO-Rusiya Şurasının, ATƏT-in və BMT Təhlükəsizlik Şurasının söykəndiyi dəyər və prinsiplərə zidd olduğu bildirilir. Bu ərazilərdə Gürcüstan hökumətinin razılığı olmadan hərbi bazalarının olmasından ciddi narahatlıq da sənəddə ifadə olunur.
Qeyd edək ki. NATO-nun Strasburq və Kehl şəhərlərində keçirilən zirvə toplantısında əsas müzakirələrdən biri də NATO-Rusiya münasibətlərinin yaxşılaşdırılması olmuşdur.