İsrail polisi Qüdsdə (Yerusəlim) yaşayan Türkiyə vətəndaşı İzzət Şahini həbs edib. Bu barədə CNN Turk saytı yazır.
Yəhudi Universitetinin tələbəsi İzzət Şahin dörd gün əvvəl İordan çayının qərb sahilində yerləşən Vifleemdə nəzarət-buraxılış məntəqəsində saxlanılıb və İsrailin Petax Tikva şəhərindəki həbsxanaya göndərilib.
Türkiyənin Təl-Əvivdəki səfirliyi həbs faktını təsdiqləyərək əlavə edib ki, həbsin səbəbləri elə diplomat üçün də naməlumdur. CNN Turk saytının verdiyi məlumata görə, türkiyəli tələbə mayın 4-da məhkəmə qarşısına çıxarılacaq.