Ermənistanın xarici işlər naziri Edvard Nalbandyan yaxın vaxtlarda İrana səfər edəcək. Bu barədə Ermənistan XİN rəhbərinin müavini Arman Kirakosyan bildirib. Məlumatı ISNA informasiya agentliyi yayıb.
O qeyd edib ki, Ermənistanın xarici işlər naziri İranın Dağlıq Qarabağ münaqişəsinin nizamlanmasında vasitəçilik məsələsini müzakirə etməyi planlaşdırır.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağın və işğal olunmuş ərazilərin azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.