Bakı. Trend:
ABŞ-da sərnişinləri daşıyan "Piper PA-32" markalı birmühərrikli təyyarə Kaliforniyanın Los-Anceles şəhəri yaxınlığında, "Pomona Raceway" treki ərazisində qəzaya uğrayıb.
Trend xəbər verir ki, hadisə təyyarənin yaxınlıqdakı hava limanına eniş etməyə çalışdığı zaman baş verib. Təyyarədə olan dörd nəfərdən üçü xəstəxanaya çatdırılıb. Onlardan ikisinin vəziyyəti ağırdır.
Hadisə zamanı yerə düşən zərbədən xəsarət alan olmasa da, park edilmiş bir neçə avtomobilə ciddi ziyan dəyib.
Məlumata görə, qəza baş verən gün Pomonada azarkeşlərin iştirak etdiyi avtomobil yarışlarının finalı keçirilib. Hadisə səbəbindən tədbir qısa müddətə dayandırılsa da, sonradan davam etdirilib.
Qəzanın səbəbləri hazırda ABŞ Federal Aviasiya İdarəsi tərəfindən araşdırılır.