Digər final görüşünün nəticəsi əlavə olunub (ilk xəbər saat 19:01-də yayılıb)
Azərbaycan, Bakı, 26 iyun /Trend, müxbir Elçin Mehdiyev/
Bu gün Bakı-2015 Avropa Oyunları çərçivəsində kişilər arasında yüngülvari çəki (52 kq) dərəcəsində Azərbaycanı təmsil edən Elvin Məmişzadə final görüşünə çıxıb.
Trend-in məlumatına görə, idmançımız finalda italiyalı boksçu Vinçenzo Pikardi ilə qarşılaşıb.
Gərgin keçən həlledici döyüşdə boksçumuz qalib gəlib - 3:0.
Beləliklə, E.Məmişzadə Azərbaycana Avropa Oyunlarında 16-cı qızıl medalı qazandırıb.
X X X
Kişilər arasında birinci yarım-orta çəki (64 kq) dərəcəsində Azərbaycanı təmsil edən Kollazo Sotomayor da bu gün final görüşünü keçirib.
Təmsilçimiz finalda italiyalı boksçu Vinçenzo Manciakarpe ilə üz-üzə gəlib.
Aramsız qarşılıqlı zərbələrlə müşayiət olunan görüşdə boksçumuz daha dəqiq olub - 3:0.
Beləliklə, K.Sotomayor Azərbaycana Avropa Oyunlarında 17-ci qızıl medalı qazandırıb. Azərbaycan idmançıları ümumilikdə 49 medal əldə ediblər - 17 qızıl, 13 gümüş, 19 bürünc.