Azərbaycan, Bakı, 13 dekabr /Trend Life, müxbir E.Hüseynzadə/
Dünya kinosunun superulduzu Jerar Depardye bazar ertəsi Bakıda Azərbaycanın mədəniyyət və turizm naziri Əbülfəz Qarayevlə görüşüb. Görüşdə kinematoqrafiya səhəsində əməkdaşlıq üzrə məsələlər və bir sıra layihələr müzakirə edilib. Jurnalistlərin görüşdən sonra Depardyenin bəzi siyasi məsələlərlə bağlı fikrini öyrənmək cəhdlərinə aktyor belə cavab verib: "Mən siyasət haqqında danışmağı sevmirəm. Mən təcavüzə və zorakılığa nifrət edirəm və ideologiyaya deyil, yalnız insana inanıram".
Nazirlə görüşədək Depardye Fəxri Xiyabanı ziyarət edib, Azərbaycan xalqının ümumilli lideri Heydər Əliyevin xatirəsini yad edib və onun məzarı önünə əklil qoyub. Jerar Depardye, həmçinin görkəmli oftalmoloq alim, akademik Zərifə Əliyevanın da məzarı önünə gül dəstəsi qoyub.
Sonra fransalı aktyor Şəhidlər Xiyabanını ziyarət edib və Azərbaycanın müstəqilliyi uğrunda həlak olanların "Əbədi məşəl" abidəsi önünə güllər qoyub.
Daha sonra Jerar Depardye Azərbaycan paytaxtını gəzib və öz heyranlığını ifadə edib. O, xüsusilə onu müşayiət edən şəxslərdən Bakıda gedən tikinti işləri barədə soruşub. Sonra Bulvar v İçəri Şəhəri gəzib.
Jerar Depardye Bakıya IV Beynəlxalq Rostropoviç festivalında iştirak etmək üçün gəlib və bu gün Azərbaycan Dövlət Akademik Opera və Balet Teatrında "Karmen" tamaşasından əvvəl çıxış edəcək. O, Prosper Merimenin "Karmen" novellasından seçilmiş parçalar oxuyacaq.
J.Bizenin "Karmen" tamaşası IV Beynəlxalq Rostropoviç festivalında Opera Mərkəzinin solisti Qalina Vişnevskayanın iştirakı ilə göstəriləcək. Festival dekabrın 12-dən 19-dək Heydər Əliyev Fondunun, Rostropoviç Fondunun və Azərbaycanın Mədəniyyət və Turizm Nazirliyinin dəstəyilə keçirilir.
Bakıda olduğu müddətdə fransız kinosunun superulduzu Jerar Depardye üçün xüsusi proqram hazırlanacaq və o, bir neçə gün burada olacaq. Aktyorun ölkənin regionlarına da gedəcəyi planlaşdırılır.