Heydər Əliyev Mərkəzində təqdim olunacaq “Əbədi sevgi” Qala-konserti və “Sibir” operasının videoçarxı yayımlandı (VİDEO)

Azərbaycan, Bakı, 15 oktyabr /Trend, müxbir İ.İzzət/

Bakıda ilk dəfə Heydər Əliyev Mərkəzində təqdim olunacaq "Əbədi sevgi" Qala-konserti və "Sibir" operasının videoçarxı yayımlanıb.

Trend-in məlumatına görə, noyabrın 2-də Heydər Əliyev Mərkəzində Rusiyanın xalq artisti Dmitri Bertmanın quruluşunda "Əbədi sevgi" Qalakonserti, noyabrın 3-də isə italyan bəstəkarı Umberto Cordanonun (Umberto Giordano) rus həyatından bəhs edən "Sibir" operası tamaşaçılara təqdim ediləcək.

Heydər Əliyev Mərkəzinin Auditorim zalında möhtəşəm "Əbədi sevgi" layihəsi çərçivəsində 1960-cı illərin romantik hitləri, müxtəlif nəsillərin sevə-sevə dinlədiyi lirik musiqilər səslənəcək. Əfsanəvi "Bitlz" (The Beatles) qrupunun, Merilin Monro (Marilyn Monroe), Tina Törner (Tina Turner), Demis Russos (Demis Roussos), Adriano Çelentano (Adriano Celentano), Elton Con (Elton John), Selin Dion (Celine Dion), Uitni Hyuston (Whitney Houston) və digər dünya ulduzlarının repertuarından məşhur mahnıların daxil olduğu Qala-konsert tamaşaçılara unudulmaz anlar vəd edir.

Noyabrın 3-də isə italyan bəstəkarı Umberto Cordanonun rus həyatından bəhs edən "Sibir" operasında iki gəncin sevgi hekayəsinin şahidi olacaqsınız. Quruluşçu rejissor Dmitri Bertmanın səhnələşdirdiyi "Sibir" operası təmtəraqlı çar Peterburqunda başlayıb, katorqada faciəvi sonluqla bitən sevgi hekayəsindən bəhs edir.

"Əbədi sevgi" Qala-konsertinin və "Sibir" operasının biletləri tezliklə satışda olacaq.